പൊന്നാനി: പാതയോരങ്ങളെല്ലാം എണ്ണപ്പലഹാര വില്‍പന സ്റ്റാളുകളാല്‍ സജീവമാണ് . ജില്ലയുടെ മിക്കയിടങ്ങളിലും ഇതാണ് സ്ഥിതി .ഒറ്റക്കും കൂട്ടായും തുടങ്ങുന്ന ഈ കടകളിലൊക്കെയും വൈകുന്നേരമായാല്‍ നല്ല തിരക്കുമാണ് .നാട്ടുകാര്‍ മാത്രമല്ല ബംഗാളികള്‍ വരെ ഇവിടെ തട്ടുകട തുടങ്ങിയിട്ടുണ്ട് .
മലയാളികളുടെ ഭക്ഷണശീലത്തിന്റെ ഭാഗമാണ് ബേക്കറി ,എണ്ണപലഹാരങ്ങള്‍ . എണ്ണയില്‍ വറുത്തതും പൊരിച്ചതുമൊക്കെ നാടിന്റെ മുക്കിലും മൂലയിലും കിട്ടും. പക്ഷേ ഇവയില്‍ പലതും എവിടെയാണ്, എങ്ങനെയുണ്ടാക്കുന്നതെന്ന് ആരും തിരക്കാറില്ല. ജില്ലയുടെ മുക്കിലും മൂലയിലും എണ്ണപ്പലഹാരത്തിന്റെ അനവധി വില്‍പ്പന കേന്ദ്രങ്ങള്‍ കാണാം. ബേക്കറിത്തട്ടുകളിലുമുണ്ട് ആളെ നോക്കി ചിരിക്കുന്ന പൊരിച്ച പലഹാരങ്ങള്‍. നഗരത്തിലെങ്ങും പലഹാരമുണ്ടാക്കിവില്‍ക്കുന്ന ഇതര സംസ്ഥാനക്കാരുടെ തന്മനത്തിലുള്ള ചെറുകിട കേന്ദ്രത്തിലാണ് അന്വേഷണം നടത്തിയത്.
തൊഴിലാളികള്‍ സമൂസയുണ്ടാക്കുകയായിരുന്നു. ചൂലുകണ്ടിട്ട് മാസങ്ങളായ കെട്ടിടം. ചെളിപിടിച്ച മേശപ്പുറം. ഇവിടെയാണ് പലഹാരമുണ്ടാക്കിക്കൂട്ടുന്നത്. ഭിത്തിയിലെ ചെളിയില്‍ത്തട്ടി സമൂസ മേശപ്പുറത്തേക്ക് വീഴുന്നു. മുറിയിലെങ്ങും അവശിഷ്ടങ്ങള്‍ കെട്ടിക്കിടക്കുകയാണ്. ഇവയ്ക്കിടയിലാണ് വറുക്കാന്‍ തയാറാക്കിയ പലഹാരങ്ങളും. അടുപ്പിലെ എണ്ണയില്‍ തിളയ്ക്കുന്ന പത്തിരി. തൊട്ടുപിന്നാലെ ഇതേ എണ്ണയില്‍ സമൂസ. പിന്നെ ബോണ്ടയും നെയ്യപ്പവും പിറകേ പിറകേ .
എണ്ണക്കുമാത്രം മാറ്റമില്ല. കറുത്ത് കുഴമ്പുപരുവത്തിലായാലേ മാറ്റൂ. കരിഓയിലിന് സമാനമായ എണ്ണയും പക്ഷേ വെറുതെ കളയില്ല. അത് സമൂസയുടെ പുറത്ത് തേയ്ക്കും. ഉഴുന്നവടക്കുളള കൂട്ടില്‍ മൈദ ചേര്‍ത്ത് കലക്കുന്നു. ലാഭം വേണമെങ്കില്‍ ഇങ്ങനെയൊക്കെ വേണമെന്നാണ് തൊഴിലാളികളുടെ പക്ഷം. ഇത്തരം സാഹചര്യങ്ങളില്‍നിന്നെത്തുന്ന പലഹാരങ്ങളാണ് കടുത്ത രോഗങ്ങളുണ്ടാക്കുന്നതെന്ന് ആരോഗ്യവിദഗ്ധര്‍ പറയുന്നു. പലവട്ടം ഉപയോഗിച്ച എണ്ണ കൊടും വിഷമാണ്. അവ കാന്‍സറുണ്ടാക്കാന്‍ കാരണമാകുമെന്ന് ഡോക്ടര്‍മാര്‍ പറയുന്നു .
അന്യസംസ്ഥാനക്കാര്‍ മാത്രമല്ല മറ്റു പലരും ഇത്തരത്തില്‍ തന്നെയാണ് പൊരിക്കടികള്‍ തയ്യാറാക്കുന്നത്. ചുരുക്കം ചില കടകള്‍ ഇതിനെല്ലാം അപവാദമായുണ്ട് .പക്ഷെ ഒരിക്കല്‍ ഉപയോഗിച്ച എണ്ണ വീണ്ടും ഉപയോഗിക്കരുതെന്നാണ് ആരോഗ്യവകുപ്പ് അധികൃതര്‍ നല്‍കുന്ന മുന്നറിയിപ്പ് .പക്ഷെ അതൊന്നും എവിടെയും പാലിക്കപ്പെടുന്നില്ല എന്നതാണ് യാഥാര്‍ഥ്യം.