പത്തനംതിട്ട: കറന്‍സി നിരോധനത്തെ തുടര്‍ന്നുണ്ടായ പ്രതിസന്ധി മറികടക്കാന്‍ സര്‍ക്കാരിന്റെ മൗനാനുവാദത്തോടെ പുതുതലമുറ ബാങ്കുകളെ ആശ്രയിച്ച സഹകരണ സംഘങ്ങളും സൊസൈറ്റികളും പ്രതിസന്ധിയില്‍.
അക്കൗണ്ടുകളെക്കുറിച്ചുള്ള ആദായനികുതി വകുപ്പിന്റെയും സി.ബി.ഐയുടെയും ചോദ്യങ്ങള്‍ക്ക് മറുപടി നല്‍കാന്‍ കഴിയാതെ കുഴഞ്ഞിരിക്കുകയാണ് സംഘങ്ങളും സൊസൈറ്റികളും. ഇതോടെ സര്‍ക്കാര്‍ നല്‍കിയ രഹസ്യനിര്‍ദേശം സഹകരണ ചട്ടത്തിന്റെ ലംഘനമാണെന്നും വ്യക്തമായി.

കറന്‍സി നിരോധനം വന്നപ്പോള്‍ പ്രാഥമിക ബാങ്കുകളില്‍ ഉണ്ടായിരുന്ന പഴയ നോട്ടുകള്‍ എന്തുചെയ്യണമെന്നറിയാതെ ഭരണസമിതിയും ജീവനക്കാരും സംശയിച്ചപ്പോഴാണ് നിയമം മറികടന്ന് ഇവ പുതുതലമുറ ബാങ്കുകളിലേക്ക് മാറ്റാന്‍ സര്‍ക്കാര്‍ മൗനാനുവാദം നല്‍കിയത്. ഇതേത്തുടര്‍ന്ന് പല സംഘങ്ങളും പുത്തന്‍ ബാങ്കുകളില്‍ അക്കൗണ്ട് എടുക്കുകയും ഇടപാടുകള്‍ നടത്തുകയും ചെയ്തു.
ഇങ്ങനെ കഴിഞ്ഞ മാസം പുതിയ അക്കൗണ്ടുകള്‍ തുറന്ന സംഘങ്ങളെ പ്രാഥമിക അന്വേഷണത്തില്‍ കണ്ടെത്തിയിട്ടുണ്ട്. റിസര്‍വ് ബാങ്ക് അനുവദിച്ചതില്‍ കൂടുതല്‍ പണം നല്‍കാമെന്ന വാഗ്ദാനവുമായി പുതുതലമുറ ബാങ്കുകള്‍ സഹകരണ ബാങ്ക് ഭരണസമിതികളെ സമീപിക്കുകയായിരുന്നു.

അതിനിടെ പുതുതലമുറ ബാങ്കുകളുടെ അക്കൗണ്ടുകളില്‍ പലയിടത്തും വന്‍ നിക്ഷേപം നടന്നതോടെ നടത്തിയ പരിശോധനകള്‍ക്കിടെയാണ് സംഘങ്ങളുടെ നിക്ഷേപങ്ങളും ശ്രദ്ധയില്‍പ്പെട്ടത്.
ചിലയിടങ്ങളില്‍ ഇത് നിയമവിധേയമല്ലെന്നും വ്യക്തമായിട്ടുണ്ട്. ഈ സാഹചര്യത്തിലാണ് സംഘങ്ങളും സൊസൈറ്റികളും പുതുതലമുറ ബാങ്കുകളില്‍ നടത്തിയ നിക്ഷേപത്തെപ്പറ്റി അന്വേഷണം ആരംഭിച്ചത്.
അതേസമയം പുതുതലമുറ ബാങ്കിലെ നിക്ഷേപങ്ങള്‍ സഹകരണചട്ട ലംഘനമാണെന്നാണ് ചൂണ്ടിക്കാട്ടപ്പെടുന്നത്. സര്‍ക്കാരിന്റെയും സഹകരണ വകുപ്പിന്റെയും അനുമതിയില്ലാതെ സഹകരണേതര ബാങ്കുകളില്‍ അക്കൗണ്ട് തുറക്കരുതെന്നാണ് ചട്ടം. പൊതുമേഖലാ ബാങ്കുകളില്‍ പോലും അക്കൗണ്ട് തുറക്കുന്നതിന് പ്രാഥമിക ബാങ്കുകള്‍ക്ക് വിലക്കുണ്ട്.

ജില്ലാ-സംസ്ഥാന സഹകരണ ബാങ്ക് ശാഖകള്‍ ഇല്ലാത്തിടത്തു മാത്രമാണ് ഇതിന് അനുമതി നല്‍കുന്നത്. എന്നാല്‍ ഈ വ്യവസ്ഥകള്‍ ലംഘിക്കപ്പെട്ടിരിക്കുന്നു എന്നതാണ് പല സംഘങ്ങളെയും പ്രതിക്കൂട്ടിലാക്കുന്നത്.
പുതിയ അക്കൗണ്ടുകള്‍ തുറക്കാന്‍ സംസ്ഥാന സര്‍ക്കാര്‍ രേഖാമൂലം അനുമതി നല്‍കിയിട്ടില്ലെന്നും കേന്ദ്ര ഏജന്‍സികളുടെ പരിശോധനയില്‍ കണ്ടെത്തിയെന്നാണ് വിവരം. സംസ്ഥാന സഹകരണ-ധന വകുപ്പുകള്‍ നല്‍കിയ വാക്കാലുള്ള അനുമതി രേഖാമൂലമാക്കാന്‍ ചട്ടം അനുവദിക്കാത്തതും പ്രാഥമിക ബാങ്കുകളുടെ പ്രതിസന്ധിയേറ്റുന്നു.