ദോഹ: മലപ്പുറം പരിയാപുരം സ്വദേശി ഖത്തറില്‍ വാഹനാപകടത്തില്‍ മരിച്ചു. പരേതനായ തറയില്‍ ഹംസയുടെ മകന്‍ മുജീബ് (37) ആണ് ഇന്നലെ പുലര്‍ച്ചെ ഖത്തര്‍ സ്റ്റീലില്‍ നിന്നും ഉംസഈദിലേക്ക് തൊഴിലാളികളെ വിട്ട് മടങ്ങുന്നതിനിടെ അപകടത്തില്‍പ്പെട്ട് മരിച്ചത്. മുജീബ് ഓടിച്ച സിവിലിയന്‍ ബസ്സാണ് അപകടത്തില്‍പ്പെട്ടത്. റോഡിലേക്ക് തെറിച്ചുനിന്ന കമ്പിയില്‍ വാഹനമിടിക്കുകയും കമ്പി മുജീബിന്റെ ശരീരത്തില്‍ തുളച്ചുകയറുകയുമായിരുന്നുവെന്നാണ് പ്രാഥമിക നിഗമനം. മറ്റൊരു വാഹനത്തിന് സൈഡ് കൊടുക്കുമ്പോഴാണ് അപകടമുണ്ടായതെന്ന് ദൃക്‌സാക്ഷികള്‍ പറയുന്നു. കുവൈത്തില്‍ ജോലി ചെയ്തിരുന്ന മൂജീബ് നാല് മാസം മുമ്പാണ് ഖത്തറിലെ അല്‍മില്ല്യണ്‍ കമ്പനിയില്‍ ഡ്രൈവര്‍ ജോലിക്കെത്തിയത്. മൃതദേഹം ഹമദ് ആശുപത്രിയിലെ മോര്‍ച്ചറിയില്‍ സൂക്ഷിച്ചിരിക്കുകയാണ്. നടപടിക്രമങ്ങള്‍ പൂര്‍ത്തിയായ ശേഷം ഇന്ന് നാട്ടിലേക്ക് കൊണ്ടു പോകുമെന്ന് മലപ്പുറം ജില്ലാ കെ.എം.സി.സി പ്രസിഡന്റ് അബ്ദുറഷീദ് തിരൂര്‍ അറിയിച്ചു. മുജീബിന് ഭാര്യ(റസിയ)യും മൂന്ന് മക്കളുമുണ്ട്.