മാനന്തവാടി: വഴിയോര കച്ചവടക്കാരെ ഒരു സംഘം ആളുകള്‍ ചേര്‍ന്ന് മര്‍ദിച്ചതായി പരാതി. പനമരം പാലത്തിന് സമീപം പൈനാപ്പിള്‍ കച്ചവടം നടത്തുന്ന നെല്ലിയമ്പം സ്വദേശികളായ പൊറ്റമ്മല്‍ നൗഷാദ് (36), വലിയകത്ത് ദുല്‍ഫീക്കര്‍ എന്നിവര്‍ക്കാണ് മര്‍ദനമേറ്റത്.
വ്യാഴാഴ്ച രാത്രിയിലെത്തിയ രണ്ട് പേര്‍ കുറഞ്ഞ തുകക്ക് കൂടുതല്‍ സാധനം ആവശ്യപ്പെടുകയായിരുന്നു. സാധനം നല്‍കാന്‍ തയാറാകാതിരുന്നതോടെ ഇവര്‍ ഭീഷണിപ്പെടുത്തുകയും കുറച്ച് സമയങ്ങള്‍ക്ക് ശേഷം കൂടുതല്‍ ആളുകളുമായെത്തി തങ്ങളെ ക്രൂരമായി മര്‍ദിക്കുകയും, സാധനങ്ങള്‍ നശിപ്പിക്കുകയും പണം കൈക്കലാക്കുകയായിരുന്നുവെന്നും ജില്ലാശുപത്രിയില്‍ ചികിത്സയില്‍ കഴിയുന്ന ഇരുവരും പറഞ്ഞു.
ഇത് സംബന്ധിച്ച് പനമരം സ്വദേശികളായ കണ്ടാലറിയാവുന്ന 10 പേര്‍ക്കെതിരെ പനമരം പൊലിസില്‍ പരാതി നല്‍കിയിട്ടുണ്ട്.