പാനൂര്‍: പാനൂരിനടുത്ത് ചെണ്ടയാട് വരപ്രയില്‍ മൂന്ന് സി.പി.എം പ്രവര്‍ത്തകര്‍ക്ക് വെട്ടേറ്റു. അശ്വന്ത് (24), രജിത്ത് (28), അതുല്‍ (24) എന്നിവര്‍ക്കാണ് വെട്ടേറ്റത്. മൂന്നു പേരെയും കോഴിക്കോട് മെഡിക്കല്‍ കോളജ് ആശുപത്രിയില്‍ പ്രവേശിപ്പിച്ചു. ബി.ജെ.പി പ്രവര്‍ത്തകരാണ് അക്രമത്തിന് പിന്നിലെന്ന് സി.പി.എം ആരോപിച്ചു. പുതുവര്‍ഷാഘോഷ പരിപാടിയില്‍ പങ്കെടുത്തു മടങ്ങുകയായിരുന്നവരെ യാതൊരു കാരണവുമില്ലാതെ ആക്രമിക്കുകയായിരുന്നുവെന്ന് സി.പി.എം നേതൃത്വം പറഞ്ഞു.
ഇന്നലെ പുലര്‍ച്ചെ മൂന്ന് മണിയോടെയാണ് സംഭവം. മൂന്ന് പേരെയും ഉടന്‍ തലശ്ശേരി സഹകരണ ആശുപത്രിയില്‍ എത്തിച്ചെങ്കിലും പരുക്ക് ഗുരുതരമായതിനാല്‍ കോഴിക്കോട് മെഡിക്കല്‍ കോളജിലേക്ക് മാറ്റുകയായിരുന്നു.
തലേശ്ശരി ഡിവൈ.എസ്.പി പ്രിന്‍സ് എബ്രഹാമിന്റെ നേതൃത്വത്തില്‍ പ്രദേശത്ത് പൊലിസ് കാവല്‍ ശക്തമാക്കിയിട്ടുണ്ട്. സംഘര്‍ഷം വ്യാപിക്കാതിരിക്കാന്‍ മൂന്ന് കമ്പനി സായുധ സേനയെയും വിന്യസിച്ചിട്ടുണ്ട്.