തേഞ്ഞിപ്പലം: ഓടിക്കൊണ്ടിരിക്കെ ബ്രേക്ക് നഷ്ടപ്പെട്ട് റോഡ്‌റോളര്‍ റോഡരികിലെ വീട്ടുമുറ്റത്തേക്കു മറിഞ്ഞു. വീടിന്റെ മതില്‍ തകര്‍ത്താണ് റോളര്‍ വീട്ടുമുറ്റത്തേക്കു കൂപ്പുകുത്തിയത്. പറമ്പില്‍ പീടിക-നീരോല്‍പാലം റോഡില്‍ വടക്കീല്‍മാട് പള്ളിക്ക് സമീപം ഇന്നലെ വൈകിട്ട് അഞ്ചരയോടെയാണ് സംഭവം.
മണ്ണാറക്കല്‍ അലിയുടെ വീട്ടുമുറ്റത്തേക്കാണ് റോളര്‍ മറിഞ്ഞത്. എതിര്‍ദിശയില്‍നിന്നു വരികയായിരുന്ന ബൈക്ക് യാത്രക്കാരനെ രക്ഷിക്കാന്‍വേണ്ടി ബ്രേക്ക് നഷ്ടപ്പെട്ട റോളറിനെ ഡ്രൈവര്‍ വഴിതിരിച്ചുവിട്ടതോടെയാണ് റോഡരികിലെ മതിലിലിടിച്ച് സമീപത്തെ വീട്ടുമുറ്റത്തേക്ക് കൂപ്പുകുത്തിയത്. മറിയുന്നതിനു മുന്‍പായി ഡ്രൈവര്‍ വാഹനത്തില്‍നിന്നു ചാടി രക്ഷപ്പെടുകയായിരുന്നു.