തളിപ്പറമ്പ് : സിവില്‍ എന്‍ജിനീയറായ യുവാവിനെ കാറില്‍ത്തട്ടിക്കൊണ്ടു പോയി വധിക്കാന്‍ ശ്രമിച്ചതായി പരാതി. പൂമംഗലം സ്വദേശിയായ കെ. ഹംസക്കുട്ടിയാണ് ആക്രമത്തിനിരയായത്. ഇയാളെ തളിപ്പറമ്പ് സഹകരണാശുപത്രിയില്‍ പ്രവേശിപ്പിച്ചു. കഴിഞ്ഞ 31ന്് രാത്രി 7.30 നായിരുന്നു സംഭവം. ഹംസക്കുട്ടി തളിപ്പറമ്പിലെ ഒരു പ്രവാസിയുടെ വീട് നിര്‍മാണം കരാര്‍ വ്യവസ്ഥയില്‍ ഏറ്റെടുത്തിരുന്നു. നിര്‍മാണ പ്രവര്‍ത്തനങ്ങള്‍ നടന്നു വരുന്നതിനിടയില്‍ പ്രവാസിയുടെ ബന്ധുക്കളില്‍ ചിലര്‍ കരാറിന് പുറമെയുള്ള പ്രവൃത്തികള്‍ ചെയ്യണമെന്നാവശ്യപ്പെട്ട് രംഗത്തെത്തി. എന്നാല്‍ കരാറിന് പുറമെയുള്ള പ്രവൃത്തികള്‍ ചെയ്യുന്നതിന് പൊതുവില്‍ നിലനില്‍ക്കുന്ന കൂലിവ്യവസ്ഥ ഹംസക്കുട്ടി ആവശ്യപ്പെട്ടതോടെ ഇവര്‍ തമ്മില്‍ തര്‍ക്കം ഉടലെടുത്തിരുന്നു.
ഈ പ്രശ്‌നം പറഞ്ഞ് തീര്‍ക്കാമെന്ന് പറഞ്ഞതനുസരിച്ച് മന്നയിലേക്ക് വിളിച്ചുവരുത്തിയ ഹംസക്കുട്ടിയെ കാറിലെത്തിയ സംഘം ആക്രമിക്കുകയായിരുന്നു. തുടര്‍ന്ന് അവിടെ നിന്നും കാറില്‍ തട്ടിക്കൊണ്ടുപോയി സീതിസാഹിബ് സ്‌ക്കൂളിന് സമീപത്ത് നിന്നും ആയുധം കൊണ്ടും അക്രമിച്ചതായും ഹംസക്കുട്ടി പരാതിയില്‍ പറയുന്നു. തളിപ്പറമ്പ് പൊലീസ് ആശുപത്രിയിലെത്തി ഹംസക്കുട്ടിയുടെ മൊഴിയെടുത്തു. എസ്.ഐ.പി രാജേഷിന്റെ നേതൃത്വത്തില്‍ അന്വേഷണം തുടങ്ങി.