സാന്‍ഫ്രാന്‍സിസ്‌കോ:16ാം നൂറ്റാണ്ടിലെ പ്രസിദ്ധമായ നെപ്ട്യൂണ്‍ പ്രതിമയുടെ ചിത്രം ഫേസ്ബുക്ക് നഗ്നതാ പ്രദര്‍ശനം ആരോപിച്ച് നീക്കം ചെയ്തു. അബദ്ധം മനസിലാക്കി പിന്നീട് മാപ്പ് പറഞ്ഞു. കടല്‍ദേവനെന്ന് വിശ്വസിക്കപ്പെടുന്ന നെപ്ട്യൂണിന്റെ പ്രതിമ ഇറ്റലിയിലെ ബൊളോഗ്്‌നയിലെ പിയാസ ഡെല്‍ നെട്ടുനോ ചത്വരത്തിലാണുള്ളത്.
ചരിത്ര കലാകാരനായ എലിസാ ബാര്‍ബറിയാണ് ഫേസ്ബുക്കില്‍ ചിത്രം പോസ്റ്റ് ചെയ്തത്. ബൊളോഗ്്‌നയെ കുറിച്ചുള്ള പോസ്റ്റിലായിരുന്നു ഇത്. എന്നാല്‍ ആരോ റിപ്പോര്‍ട്ട് ചെയ്തതിന്റെ അടിസ്ഥാനത്തില്‍ പ്രതിമയുടെ ചരിത്രപ്രാധാന്യം നോക്കാതെ ഫേസ്ബുക്ക് നീക്കം ചെയ്യുകയായിരുന്നു.
സംഭവം വിവാദമായതിനെ തുടര്‍ന്ന് ഫേസ്ബുക്ക് മാപ്പപേക്ഷ നടത്തി. ദശലക്ഷക്കണക്കിന് ചിത്രങ്ങള്‍ പരിശോധിക്കുന്നതിനിടെ സംഭവിച്ച പിഴവാണെന്നും ചിത്രം തങ്ങളുടെ നയത്തിന് എതിരല്ലെന്നും പ്രസ്താവനയില്‍ പറഞ്ഞു. 1972ല്‍ പുലിറ്റ്‌സര്‍ അവാര്‍ഡ് നേടിയ വിയറ്റ്‌നാം യുദ്ധത്തിന്റെ ചിത്രവും ഫേസ്ബുക്ക് നഗ്നതാപ്രദര്‍ശനം ആരോപിച്ച് നീക്കം ചെയ്തിരുന്നു.