മുംബൈ: അഴിമതിയ്‌ക്കെതിരായി പ്രവര്‍ത്തിക്കുന്നുവെന്ന് അവകാശപ്പെടുന്ന അണ്ണാ ഹസാരെ ആര്‍.എസ്.എസിന്റെ ഏജന്റാണെന്ന് എന്‍.സി.പി. പഞ്ചസാര സഹകരണ സംഘം ഫാക്ടറി തട്ടിപ്പുമായി ബന്ധപ്പെട്ട സംഭവത്തില്‍ സി.ബി.ഐ അന്വേഷണം ആവശ്യപ്പെട്ട് ബോംബെ ഹൈക്കോടതിയെ സമീപിച്ച ഹസാരെയുടെ നടപടിയെ ചോദ്യം ചെയ്താണ് എന്‍.സി.പി വക്താവ് നവാബ് മാലിക് അദ്ദേഹത്തെ ആര്‍.എസ്.എസ് ഏജന്റാണെന്ന് ആരോപിച്ചത്.
തട്ടിപ്പില്‍ എന്‍.സി.പി നേതാവ് ശരത് പവാറിന് പങ്കുണ്ടെന്ന് നേരത്തെ ആര്‍.എസ്.എസ് ആരോപിച്ചിരുന്നു. അദ്ദേഹത്തെ അപകീര്‍ത്തിപ്പെടുത്താനുള്ള അവരുടെ നീക്കത്തിന് സഹായം നല്‍കുകയാണ് അണ്ണാ ഹസാരെ ചെയ്യുന്നതെന്നും നവാബ് മാലിക് ആരോപിച്ചു.