മലപ്പുറം: വിവിധ സര്‍വകലാശാലകളിലെ അസിസ്റ്റന്റ് തസ്തികളിലേക്കുള്ള പരീക്ഷ ജില്ലയില്‍ പൂര്‍ത്തിയായി. സര്‍വകലാശാലകളിലെ അസിസ്റ്റന്റ് നിയമനം പി.എസ്.സിക്കു വിട്ടതിനു ശേഷമുള്ള ആദ്യപരീക്ഷയാണു സംസ്ഥാനത്തുടനീളം നടന്നത്. ജില്ലയില്‍ നിന്നു തെരഞ്ഞെടുക്കപ്പെട്ട 147 കേന്ദ്രങ്ങളില്‍ നടന്ന പരീക്ഷക്കു 39,123 പേരായിരുന്നു രജിസ്റ്റര്‍ ചെയ്തിരുന്നത്. നിലവിലുള്ള അഞ്ഞൂറോളം ഒഴിവുകള്‍ക്കു പുറമേ വരാനിരിക്കുന്ന അയ്യായിരത്തോളം സര്‍വകലാശാല അസിസ്റ്റന്റ് തസ്തികയിലെ ഒഴിവുകളിലേക്കും പി.എസ്.സി നടത്തിയ പരീക്ഷയുടെ റാങ്ക് അടിസ്ഥാനത്തിലായിരിക്കും നിയമനം നടക്കുക. ഉച്ചക്കു 1.30നു തുടങ്ങിയ പരീക്ഷ 3.15നാണ് അവസാനിച്ചത്.