കാസര്‍കോട്: ഇന്നലെ മുതല്‍ മൂന്ന് ദിവസത്തേക്ക് ജില്ലയില്‍ നിരോധനാജ്ഞ പ്രഖ്യാപിച്ചു. ജില്ലയില്‍ മൂന്ന് ദിവസത്തേക്ക് പ്രകടനങ്ങളും പൊതുയോഗങ്ങളും നടത്തുന്നത് നിരോധിച്ചതായി ജില്ലാ പൊലിസ് ചീഫ് തോംസണ്‍ ജോസ് അറിയിച്ചു. ചെറുവത്തൂരിലും ചീമേനിയിലും കാസര്‍കോട്ടും നടന്ന പ്രകടനങ്ങളിലും പൊതുയോഗങ്ങളിലും പിന്നീട് നടന്ന ഹര്‍ത്താലിലും ഉണ്ടായ അക്രമസംഭവങ്ങളെ തുടര്‍ന്നാണ് പൊലിസ് നടപടി.
ജനങ്ങളുടെ സൈ്വര്യ ജീവിതത്തിന് ഭംഗം നേരിട്ടിരിക്കുകയാണെന്നും ജില്ലയില്‍ രാഷ്ട്രീയ സംഘട്ടനങ്ങള്‍ക്കും അതുവഴി ഗുരുതരമായ ക്രമസമാധാന പ്രശ്‌നങ്ങളിലേക്കും നീളുവാനുള്ള സാധ്യത മുന്‍കൂട്ടികണ്ട് പൊതുജനങ്ങളുടെ സുരക്ഷ ഉറപ്പാക്കാനായി കേരള പൊലിസ് ആക്ട് 78, 79 വകുപ്പുകള്‍ പ്രകാരം ഇന്നലെ ഉച്ചയ്ക്ക് 11 മുതല്‍ മൂന്ന് ദിവസത്തേക്ക് നിരോധനാജ്ഞ പ്രഖ്യാപിച്ചതായാണ് ജില്ലാ പൊലിസ് ചീഫ് തോംസണ്‍ ജോസ് അറിയിപ്പ്.
ഉത്തരവ് ലംഘിച്ച് പ്രകടനമോ പൊതുയോഗമോ നടത്തിയാല്‍ അത് ന്യായവിരോധമായ സംഘം ചേരല്‍ എന്ന രീതിയില്‍ കണ്ട് എല്ലാ നിയമ നടപടികളും സ്വീകരിക്കുമെന്ന് അദ്ദേഹം അറിയിച്ചു.