പേരൂര്‍ക്കട: പ്രണയസാഫല്യത്തിന് കമിതാക്കള്‍ നടത്തിയ അക്രമനാടകം പൊലിസിനെ ഇളിഭ്യരാക്കി.
കമിതാക്കളെ പൊലിസ് താക്കീത് ചെയ്തു വിട്ടയച്ചു. ഞായറാഴ്ചയായിരുന്നു സംഭവം നടന്നത്.  മണ്ണന്തലയില്‍ ഒരു ക്ഷേത്രത്തിനു
സമീപം നിന്ന പെണ്‍കുട്ടിയെ ഹെല്‍മറ്റ് ധരിച്ചെത്തിയ ഒരാള്‍ അടിച്ചുവീഴ്ത്തിയതോടെയാണ്  സംഭവങ്ങളുടെ തുടക്കം.
പരാതിയെ തുടര്‍ന്നു അന്വേഷണം നടത്തിയ പൊലിസ് ഒരു യുവാവിനെ പിടികൂടിയിരുന്നു.  ഇയാളെ ചോദ്യം ചെയ്തതില്‍ സംശയം തോന്നിയതിനെ തുടര്‍ന്നു പൊലിസ് പെണ്‍കുട്ടിയെയും ചോദ്യം ചെയ്തതോടെയാണ് സംഗതി നാടകമായിരുന്നുവെന്ന് തെളിഞ്ഞത്.
പ്രണയത്തിന് വീട്ടുകാര്‍ എതിര്‍ത്തതോടെയാണ് കമിതാക്കള്‍ നാടകം തട്ടിക്കൂട്ടിയത്. അക്രമിക്കപ്പെടുമ്പോള്‍ പെണ്‍കുട്ടി കാമുകന്റെ പേര് വിളിച്ചു കരയുമെന്നതായിരുന്നു പ്ലാന്‍. തങ്ങളുടെ ബന്ധത്തിന്റെ തീവ്രത വീട്ടുകാരെ ബോധ്യപ്പെടുത്തുകയായിരുന്നു ലക്ഷ്യം. അതിനായി കാമുകന്‍ തന്നെ ഹെല്‍മറ്റ് ധരിച്ചു അക്രമിക്കാനായെത്തി.  എന്നാല്‍ കമിതാക്കളുടെ പദ്ധതി അല്‍പം പാളി. വീട്ടുകാര്‍ പൊലിസില്‍ പരാതി നല്‍കി. പൊലിസ് കാര്യമായി തന്നെ അന്വേഷിച്ചു. യുവാവിനെ പൊക്കി.
ഇയാള്‍ക്കെതിരേ വധശ്രമമുള്‍പടെയുള്ള വകുപ്പുകള്‍ ചുമത്തിയായിരുന്നു
കേസെടുത്തത്. പിന്നീട് സംഗതി നാടകമാണെന്നു കണ്ടതോടെ നിസാര കുറ്റം ചുമത്തി യുവാവിനെ വിട്ടയച്ചു. രണ്ടുപേര്‍ക്കും താക്കീതും നല്‍കി.