ഉരുവച്ചാല്‍: ചിറ്റാരിപറമ്പ്, മാലൂര്‍ പഞ്ചായത്തുകളിലൂടെ കടന്നു പോകുന്ന തൃക്കടാരിപ്പൊയില്‍-ഇടുമ്പ-കണ്ണവം പൊതുമരാമത്ത് റോഡിന്റെ ടാറിങ് ആരംഭിച്ചു. വര്‍ഷങ്ങളായി പൊട്ടിപൊളിഞ്ഞു കിടന്ന റോഡാണ് കഴിഞ്ഞ ദിവസം ടാറിങ് ചെയ്തുതുടങ്ങിയത്. നേരത്തെ കൃത്യസമയത്ത് പ്രവൃത്തി പൂര്‍ത്തിയാക്കാത്തതിനാല്‍ സര്‍ക്കാരും കരാറുകാരനും തമ്മില്‍ കേസായതോടെയാണ് റോഡ് പ്രവൃത്തി നിലച്ചത്. ഇതിനിടെ പലതവണ സ്ഥലത്തെ രാഷ്ട്രീയ പാര്‍ട്ടികളും മറ്റ് സംഘടനാ പ്രവര്‍ത്തകരും ചേര്‍ന്ന് അനിശ്ചിതത്വത്തിലായ റോഡ് പ്രവൃത്തി പുനരാരംഭിക്കണമെന്നാവശ്യപ്പെട്ട് പ്രക്ഷോഭങ്ങള്‍ സംഘടിപ്പിച്ചിരുന്നു. ഇപ്പോള്‍ മുന്‍ കരാറുകാരനും സര്‍ക്കാരു മായി സുപ്രിം കോടതിയില്‍ നടന്നിരുന്ന കേസിനു വിധി വന്നതോടെയാണ് തൃക്കടാരിപ്പൊയിലില്‍ നിന്നു ഇടുമ്പ-കണ്ണവം വരെ ആറു കിലോമീറ്റര്‍ ദൂരം 1.26 ലക്ഷം രൂപയുടെ പദ്ധതി സര്‍ക്കാര്‍ പുതിയ കരാറുകാരനെ ഏല്‍പിച്ച് റോഡ് പ്രവര്‍ത്തി പുനരാരംഭിച്ചത്. വാഹന ഗതാഗതം തടസ്സപ്പെടുത്താതെയാണ് പ്രവൃത്തി നടത്തുന്നത്.