തലശ്ശേരി: നഗരത്തിലെ വിദ്യാലയങ്ങളില്‍ ഉള്‍പ്പെടെ വര്‍ധിച്ചു വരുന്ന മയക്കുമരുന്ന് ഉപയോഗം കര്‍ശനമായി തടയാന്‍ ജനമൈത്രി പൊലിസിന്റെ നേതൃത്വത്തില്‍ വിളിച്ച് ചേര്‍ത്ത യോഗത്തില്‍ തീരുമാനം.
തലശ്ശേരി ഡി.വൈ.എസ്.പി പ്രിന്‍സ് അബ്രഹാമിന്റെ നേതൃത്വത്തില്‍ ഇന്നലെ ജനമൈത്രി ഹാളില്‍ വിളിച്ചുചേര്‍ത്ത യോഗത്തിലാണ് ഇതുസംബന്ധിച്ച് തീരുമാനമായത്. മയക്കുമരുന്ന് വിപണനം
തടയുന്നതിന്റെ ഭാഗമായി തലശ്ശേരി പഴയബസ്റ്റാന്റ് പരിസരത്തെ ബി.ഇ.എം.പി ഹയര്‍ സെക്കന്‍ഡറി സ്‌കൂള്‍ പരിസരത്ത് സി.സി ടിവി കാമറ സ്ഥാപിക്കണമെന്ന് യോഗത്തില്‍ ആവശ്യമുയര്‍ന്നു. ഈ മേഖലയിലാണ് വ്യാപകമായ മയക്ക് മരുന്ന് വില്‍പ്പന നടക്കുന്നതെന്ന് വിവിധ സംഘടനാ ഭാരവാഹികള്‍ പരാതിപ്പെട്ടു. മയക്കുമരുന്ന് വില്‍പന തടയാന്‍ പൊലിസിന് സഹായവാദ്ഗാനവുമായി യോഗത്തില്‍ പങ്കെടുത്ത വിവിധ സംഘടനാ ഭാരവാഹികളും മുന്നോട്ടുവന്നു.
തലശ്ശേരി നഗരത്തിലെ ട്രാഫിക് സംവിധാനം സുഗമമാക്കുക, ഭിക്ഷാടന മാഫിയകളെ നിയന്ത്രിക്കുക, വിശപ്പ്‌രഹിത തലശ്ശേരി തുടങ്ങിയ കാര്യങ്ങള്‍ പ്രാവര്‍ത്തികമാക്കാനാണ് ഇന്നലെ വിവിധ സംഘടനാ പ്രതിനിധികളുടെയും വ്യാപാരി വ്യവസായികളുടെയും യോഗം വിളിച്ചുചേര്‍ത്തത്. ബസ്സുടമസ്ഥ സംഘം നേതാക്കള്‍, നിരവധി സന്നദ്ധ സംഘടനാ പ്രതിനിധികള്‍, വ്യാപാരികള്‍ തുടങ്ങിയവര്‍ പങ്കെടുത്തു. തലശ്ശേരി നഗരത്തിലെ പാര്‍ക്കിങ് പ്രശ്‌നത്തിന് ശാശ്വത പരിഹാരം കാണാന്‍ പദ്ധതികള്‍ നടപ്പിലാക്കണമെന്ന് യോഗത്തില്‍ ആവശ്യമുയര്‍ന്നു. സ്ഥലം കണ്ടെത്തിയാല്‍ പാര്‍ക്കിങ് സൗകര്യം ഒരുക്കാന്‍ തയാറാണെന്ന് സംഘടനാ ഭാരവാഹികളും വാഗ്ദാനം ചെയ്തു. യോഗത്തില്‍ തലശ്ശേരി സി.ഐ പ്രദീപന്‍ കണ്ണിപ്പൊയില്‍, എസ്.ഐ ബി രാജീവ്, ട്രാഫിക് എസ്.ഐ മോഹന്‍ദാസ്, എ.എസ്.ഐ ബിന്ദുരാജ്, സംഘടനപ്രതിനിധികള്‍ സംസാരിച്ചു.