കാസര്‍കോട്: മുന്‍ എം.പിയും മുസ്‌ലീം ലീഗ് നേതാവുമായിരുന്ന ഹമീദലി ഷംനാടിന്റെ മയ്യത്ത് ഒദ്യോഗിക ബഹുമതികളോടെ തായലങ്ങാടി ഖിളര്‍ ജുമാ മസ്ജിദ് അങ്കണത്തില്‍ ഖബറടക്കി. ജനാസ നിസ്‌ക്കാരത്തിന് മുസ്‌ലിം ലീഗ് സംസ്ഥാന പ്രസിഡന്റ് ഹൈദരലി ശിഹാബ് തങ്ങള്‍ നേതൃത്വം നല്‍കി.

ഉച്ചയ്ക്ക് പന്ത്രണ്ടരയോടെ തായലങ്ങാടിയിലെ വീട്ടില്‍ നിന്നും വന്‍ ജനാവലിയുടെ സാന്നിധ്യത്തിലാണ് മയ്യത്ത് പള്ളിയിലെത്തിച്ചത്. ലീഗ് ദേശീയ ട്രഷറര്‍ പി.കെ.കുഞ്ഞാലികുട്ടി, സംസ്ഥാന സെക്രട്ടറി കെ.പി.എ മജീദ്, ഇ.ടി മുഹമ്മദ് ബഷീര്‍ എം.പി, മുന്‍.എം.പി പി.വി അബ്ദുല്‍ വഹാബ്, യൂത്ത് ലീഗ് സംസ്ഥാന ജനറല്‍ സെക്രട്ടറി പി.കെ ഫിറോസ് എന്നിവര്‍ മയ്യത്ത് കാണാന്‍ എത്തി. തുടര്‍ന്ന് തായലങ്ങാടിയില്‍ സര്‍വ്വകക്ഷിയുടെ നേതൃത്വത്തില്‍ അനുശോചന യോഗവും നടന്നു.