തലശ്ശേരി: മോട്ടോര്‍ വാഹന വകുപ്പ് ഒമ്പതു മുതല്‍ 15 വരെ റോഡ് സുരക്ഷാ വാരമായി ആചരിക്കുന്നതിന്റെ ഭാഗമായ് തലശ്ശേരി സബ് ആര്‍.ടി.ഓഫിസ് പരിധിയില്‍ തലശ്ശേരി, ഇരിട്ടി താലൂക്കുകളിലായി വിവിധ ബോധവത്ക്കരണ പരിപാടികള്‍ സംഘടിപ്പിച്ചു.
ഒമ്പതിന് ബസ് ഓപ്പറേറ്റേഴ്‌സ് അസോസിയേഷന്റെയും തലശ്ശേരി വാസന്‍ ഐകെയര്‍ ആശുപത്രിയുടെയും സഹകരണത്തോടെ തലശ്ശേരി പുതിയ ബസ്റ്റാന്റില്‍ ഓട്ടോ ഡ്രൈവര്‍മാര്‍ക്ക് സൗജന്യം നേത്രപരിശോധാ ക്യാംപ് നടത്തും. 10 മുതല്‍ റോഡ് സുരക്ഷാ സന്ദേശങ്ങള്‍ അവതരിപ്പിക്കുന്ന ചിത്ര രചന, ഇരുചക്ര വാഹന റാലി, മട്ടന്നൂര്‍ യൂനിവേഴ്‌സല്‍ കോളജില്‍ റോഡ് സുരക്ഷാ പ്രതിജ്ഞ, സുരക്ഷാ ക്ലാസ്, ഇരിട്ടി സി.എം.ഐ സ്‌കൂളില്‍ റോഡ് സുരക്ഷാ പ്രതിജ്ഞ, ബോധവത്ക്കരണം, 13ന് പൊലിസുമായി സഹകരിച്ച് സംയുക്ത വാഹന പരിശോധന, റോഡ് സുരക്ഷാ സന്ദേശം ഉള്‍ക്കൊണ്ട് റോഡില്‍ വാഹനം ഉപയോഗിച്ചവര്‍ക്ക് പായസ വിതരണം എന്നിവ നടക്കും.
15ന് റോഡ് സുരക്ഷാ വാരാചരണത്തിന്റെ സമാപന സമ്മേളനം കണ്ണൂരില്‍ മന്ത്രി എ.കെ ശശീന്ദ്രന്‍ ഉദ്ഘാടനം ചെയ്യും. തലശ്ശേരി സബ് ആര്‍.ടി ഓഫിസിന്റെ കീഴിലുള്ള സ്ഥലങ്ങളില്‍ റോഡ് സുരക്ഷാ സന്ദേശവുമായി പ്രചരണ വാഹനം സഞ്ചരിക്കുമെന്നും ജോയിന്റ് ആര്‍.ടി.ഒ അറിയിച്ചു. വാര്‍ത്താ സമ്മേളനത്തില്‍ ജോയിന്റ് ആര്‍.ടി.ഒ എ.കെ രാധാകൃഷ്ണന്‍, വി രാജീവന്‍, ടി വൈകുണ്ഠന്‍ പങ്കെടുത്തു.