കുന്നൂര്‍: കുന്നൂര്‍ വണ്ടിശോലയില്‍ പട്ടാപ്പകല്‍ യുവാവ് 25 പവന്‍ സ്വര്‍ണവും1.50 ലക്ഷം രൂപയും മോഷ്ടിച്ചു. ഇന്നലെ ഉച്ചക്ക് 12നാണ് സംഭവം. കുടിവെള്ളം ചോദിച്ചെത്തിയ യുവാവാണ് മോഷണം നടത്തിയത്. സംഭവ സമയത്ത് വീട്ടമ്മ ജയമണി(65) മാത്രമാണ് ഉണ്ടായിരുന്നത്. കുടിവെള്ളം എടുക്കാനായി അടുക്കളയിലേക്ക് പോകുന്നതിനിടെ ഇയാള്‍ സ്ത്രീയെ കയറ് ഉപയോഗിച്ച് കട്ടിലില്‍ ബന്ധിക്കുകയായിരുന്നു. വായില്‍ തുണിതിരുകി. തുടര്‍ന്നാണ് അലമാര കുത്തിത്തുറന്ന് മോഷണം നടത്തിയത്.
ഭര്‍ത്താവ് മരിച്ച ശേഷം സഹോദരന്റെ കൂടെയാണ് ജയമണി താമസിക്കുന്നത്. പിന്നീട് സഹോദരന്‍ വീട്ടിലെത്തിയപ്പോഴാണ് മോഷണ വിവരം അറിയുന്നത്. കുന്നൂര്‍ ഡിവൈ.എസ്.പി മുത്തമിഴിന്റെ നേതൃത്വത്തിലുള്ള സംഘവും വിരലടയാള വിദഗ്ധരും സ്ഥലത്തെത്തി പരിശോധന നടത്തി. അന്വേഷണം ഊര്‍ജിതപ്പെടുത്തിയിട്ടുണ്ട്.