ഇംഫാല്‍: മണിപ്പൂര്‍ നിയമസഭാ തെരഞ്ഞെടുപ്പില്‍ ഇറോം ഷര്‍മിളയുടെ  പ്രജാപാര്‍ട്ടി 20 സീറ്റുകളില്‍ മത്സരിക്കും. തെരഞ്ഞെടുപ്പുമായി ബന്ധപ്പെട്ട് ഷര്‍മിള പ്രചാരണം ശക്തമാക്കി. 20 മണ്ഡലങ്ങളിലായി മത്സരിക്കുന്ന പ്രജാ പാര്‍ട്ടിയുടെ അഞ്ചു സ്ഥാനാര്‍ത്ഥികളെ പ്രഖ്യാപിച്ചു.
രണ്ടു മണ്ഡലങ്ങളില്‍ ഷര്‍മിള മത്സരിക്കും. മുഖ്യമന്ത്രി ഒക്രം ഇബോബി സിങിനെതിരേ തൗബാല്‍ മണ്ഡലത്തിലും സ്വന്തം മണ്ഡലമായ ഖുറെയിലുമാണ് ഷര്‍മിള മത്സരിക്കുന്നത്.  മാര്‍ച്ച് നാല്, എട്ട് തിയതികളിലാണ് മണിപ്പൂരില്‍ തെരഞ്ഞെടുപ്പ്.
നാഗാ തീവ്രവാദി ഗ്രൂപ്പുകള്‍ ആഹ്വാനം ചെയ്ത മണിപ്പൂരിലെ സാമ്പത്തിക ഉപരോധം ഇപ്പോഴും തുടരുകയാണ്. തെരഞ്ഞെടുപ്പില്‍ ഇതും മുഖ്യ ചര്‍ച്ചാ വിഷയമാകും.
ഇറോം ഷര്‍മിളയുടെ രാഷ്ട്രീയ പ്രവേശനത്തോടെ ദേശീയ ശ്രദ്ധയാകര്‍ഷിക്കാന്‍ പോകുന്ന മണിപ്പൂര്‍ തെരഞ്ഞെടുപ്പ് പ്രചാരണ രംഗം വരും ദിവസങ്ങളില്‍ കൂടുതല്‍ പ്രശ്‌നമുഖരിതമാകാന്‍ സാധ്യതയുണ്ടെന്നാണ് രാഷ്ട്രീയ നിരീക്ഷകരുടെ വിലയിരുത്തല്‍.