കോഴിക്കോട്: അഞ്ചുദിവസം നീണ്ടുനിന്ന റവന്യു ജില്ലാ കലോത്സവത്തിനു തീരശ്ശീല വീണപ്പോള്‍ ഹൈസ്‌കൂള്‍, ഹയര്‍ സെക്കന്‍ഡറി വിഭാഗങ്ങളില്‍ സിറ്റി ഉപജില്ല ഓവറോള്‍ ചാംപ്യന്മാര്‍. യു.പി വിഭാഗത്തില്‍ ചേവായൂര്‍ ഉപജില്ലയാണ് ജേതാക്കളായത്. ഹൈസ്‌കൂള്‍ വിഭാഗത്തില്‍ കോഴിക്കോട് സിറ്റി 351 പോയിന്റ് നേടിയാണ് കിരീടം സ്വന്തമാക്കിയത്. ഒരു പോയിന്റിന്റെ വ്യത്യാസത്തില്‍ രണ്ടാം സ്ഥാനത്തായ കൊയിലാണ്ടി ഉപജില്ല 350 പോയിന്റുകള്‍ കരസ്ഥമാക്കി. മൂന്നാം സ്ഥാനത്തുള്ള ചേവായൂര്‍ ഉപജില്ല 341 പോയിന്റുകള്‍ നേടി. യു.പി വിഭാഗത്തില്‍ ചേവായൂര്‍ ഉപജില്ല 155 പോയിന്റ് നേടിയാണ് ചാംപ്യന്‍ പട്ടം സ്വന്തമാക്കിയത്. ബാലുശേരി ഉപജില്ല 142 പോയിന്റുമായി രണ്ടാം സ്ഥാനവും വടകര ഉപജില്ല 140 പോയിന്റുമായി മൂന്നാം സ്ഥാനവും നേടി. കോഴിക്കോട് സിറ്റി ഉപജില്ല 139 പോയിന്റുകളുമായി നാലാം സ്ഥാനത്താണ്. കൂടിയാട്ടത്തിന്റെ ഫലം പുറത്തു വരാനിരിക്കെ ഹയര്‍ സെക്കന്‍ഡറി വിഭാഗത്തില്‍ 336 പോയിന്റുമായാണ് കോഴിക്കോട് സിറ്റി ചാംപ്യന്‍ഷിപ്പ് നേടിയത്. രണ്ടാം സ്ഥാനത്തുള്ള ബാലുശേരി ഉപജില്ലയ്ക്ക് 312 പോയിന്റും മൂന്നാം സ്ഥാനത്തുള്ള കൊയിലാണ്ടി ഉപജില്ലയ്ക്ക് 290 പോയിന്റും ലഭിച്ചു.

ഹൈസ്‌കൂള്‍ ജനറല്‍ വിഭാഗത്തില്‍ 173 പോയിന്റ് നേടി മേമുണ്ട എച്ച്.എസ്.എസ് മികച്ച സ്‌കൂളായി. കോഴിക്കോട് സില്‍വര്‍ഹില്‍സ് എച്ച്.എസ്.എസ് 162 പോയിന്റും തിരുവങ്ങൂര്‍ എച്ച്.എസ് 137 പോയന്റും നേടി രണ്ടും മൂന്നും സ്ഥാനങ്ങള്‍ യഥാക്രമം സ്വന്തമാക്കി. യു.പി ജനറല്‍ വിഭാഗത്തില്‍ പേരാമ്പ്ര സെന്റ് ഫ്രാന്‍സിസ് സ്‌കൂളും വടകര സെന്റ് ആന്റണീസ് സ്‌കൂളും 55 പോയിന്റുമായി മികച്ച സ്‌കൂളുകളായി. കോഴിക്കോട് സില്‍വര്‍ഹില്‍സ് സ്‌കൂള്‍ 45 പോയിന്റുമായി രണ്ടാം സ്ഥാനവും 43 പോയന്റുമായി തിരുവങ്ങൂര്‍ സ്‌കൂള്‍ മൂന്നാം സ്ഥാനവും സ്വന്തമാക്കി.

അറബിക് സാഹിത്യോത്സവം ഹൈസ്‌കൂള്‍, യു.പി വിഭാഗങ്ങളില്‍ കുന്നുമ്മല്‍ ഉപജില്ലയാണ് ജേതാക്കള്‍. ഹൈസ്‌കൂള്‍ വിഭാഗത്തില്‍ കുന്നുമ്മല്‍ 63 പോയിന്റ് നേടിയപ്പോള്‍ രണ്ടാം സ്ഥാനത്തുള്ള തോടന്നൂര്‍, ബാലുശേരി, ചോമ്പാല, ഫറോക്ക് ഉപജില്ലകള്‍ 61 പോയിന്റുകള്‍ നേടി. മൂന്നാം സ്ഥാനത്തുള്ള സിറ്റി ഉപജില്ലയ്ക്ക് 56 പോയിന്റാണുള്ളത്. അറബിക് സാഹിത്യോത്സവം യു.പി വിഭാഗത്തില്‍ കുന്നുമ്മല്‍ ഉപജില്ല 93 പോയിന്റുമായി ജേതാക്കളായി. മുക്കം ഉപജില്ല 89 പോയിന്റുമായി രണ്ടാം സ്ഥാനം നേടി. സംസ്‌കൃതോത്സവം യു.പി വിഭാഗത്തില്‍ ചോമ്പാല ഉപജില്ല 87 പോയിന്റുമായി ചാംപ്യന്മാരായി. 86 പോയിന്റുമായി വടകര, ബാലുശേരി ഉപജില്ലകള്‍ രണ്ടാംസ്ഥാനവും പേരാമ്പ്ര ഉപജില്ല 83 പോയിന്റുമായി മൂന്നാം സ്ഥാനവും നേടി. വിജയികള്‍ക്കുള്ള സമ്മാനദാനം മുല്ലപ്പള്ളി രാമചന്ദ്രന്‍ എം.പി നിര്‍വഹിച്ചു. ജില്ലാ പഞ്ചായത്ത് പ്രസിഡന്റ് ബാബു പറശേരി ചടങ്ങില്‍ അധ്യക്ഷനായി. ഡോ. എം.കെ മുനീര്‍ എംഎല്‍എ, എം. രാധാകൃഷ്ണന്‍ മാസ്റ്റര്‍, ഡോ. ഗിരീഷ് ചോലയില്‍ പ്രസംഗിച്ചു.