തളിപ്പറമ്പ്: ബസ് യാത്രക്കാരന്റെ പോക്കറ്റടിച്ച കുപ്രസിദ്ധ മോഷ്ടാവിനെ നാട്ടുകാര്‍ പിടികൂടി. കപ്പാലത്തിനു സമീപം ഇന്നലെ രാവിലെയായിരുന്നു സ്വകാര്യ ബസില്‍ തളിപ്പറമ്പില്‍ നിന്നു മന്നയിലേക്കുളള യാത്രാമദ്ധ്യേ സീതിസാഹിബ് ഹൈസ്‌കൂളിനു സമീപത്തെ അലിയുടെ 24000 രൂപ മോഷ്ടിക്കപ്പെട്ടത്. പണം നഷ്ടപ്പെട്ടത് ശ്രദ്ധയില്‍പ്പെട്ടയുടനെ സമീപത്തു നിന്നയാള്‍ കപ്പാലം സ്റ്റോപ്പില്‍ ഇറങ്ങുന്നത് കണ്ട് സംശയം തോന്നിയ അലിയും പിന്നാലെ ഇറങ്ങുകയായിരുന്നു. ഇതു കണ്ടതോടെ മോഷ്ടാവ് ചപ്പാരപ്പടവിലെ ചപ്പന്റകത്ത് ഹംസ പണം റോഡില്‍ ഉപേക്ഷിച്ച് ഓടി രക്ഷപ്പെടാന്‍ ശ്രമിച്ചെങ്കിലും നാട്ടുകാര്‍ പിന്നാലെയോടി തങ്ങള്‍ പളളിക്കു സമീപത്തുനിന്നു പിടികൂടുകയായിരുന്നു. തളിപ്പറമ്പ് എസ്.ഐ പി രാജേഷിന്റെ നേതൃത്വത്തില്‍ പൊലിസ് സ്ഥലത്തെത്തി ഹംസയെ കസ്റ്റഡിയിലെടുത്തു. ഹംസ നേരത്തെയും നിരവധി മോഷണ കേസുകളില്‍ പ്രതിയാണ്. ഇയാളുടെ ഒപ്പമുണ്ടായിരുന്നതായി പറയപ്പെടുന്ന ചപ്പാരപ്പടവ് സ്വദേശി ഇക്ബാലിനെക്കുറിച്ച് പൊലിസ് അന്വേഷിച്ച് വരികയാണ്.