മലപ്പുറം: സമസ്ത കേരളാ ഇസ്‌ലാംമത വിദ്യാഭ്യാസ ബോര്‍ഡ് ജനറല്‍ സെക്രട്ടറിയും കേരള സംസ്ഥാന ഹജ്ജ് കമ്മിറ്റി ചെയര്‍മാനും മതപണ്ഡിതനും വിദ്യഭ്യാസ, സാംസ്‌കാരിക, സാമുദായിക രംഗത്തെ പ്രമുഖനുമായിരുന്ന കോട്ടുമല ടി.എം ബാപ്പു മുസ്‌ലിയാരുടെ നിര്യാണത്തില്‍ മുസ്‌ലിംലീഗ് മലപ്പുറം ജില്ലാ കമ്മിറ്റി അനുശോചിച്ചു.

നഷ്ടമായത് സമസ്തയുടെ അത്താണിയെ: എസ്.വൈ.എസ്

മലപ്പുറം: സമസ്ത കേരളാ വിദ്യാഭ്യാസ ബോര്‍ഡ് ജനറല്‍ സെക്രട്ടറി കോട്ടുമല ടി.എം ബാപ്പു മുസ്‌ലിയാരുടെ നിര്യാണംമൂലം നഷ്ടമായതു പിതാവിനെപ്പോലെ എസ്.വൈ.എസിന്റെ കാര്യങ്ങള്‍ ശ്രദ്ധിക്കുകയും ഇടപെടുകയും ചെയ്തിരുന്ന നേതാവിനെയാണെന്നു സുന്നി യുവജന സംഘം ജില്ലാ കമ്മിറ്റി.
പ്രതിസന്ധി ഘട്ടങ്ങളില്‍ യുക്തമായ തീരുമാനമെടുക്കാനുള്ള ആര്‍ജവവും പ്രശ്‌ന പരിഹാരത്തിനുള്ള ത്രാണിയും അദ്ദേഹത്തിന്റെ സവിശേഷതയായിരുന്നെന്നും യോഗം വിലയിരുത്തി. പ്രസിഡന്റ് പാണക്കാട് സയ്യിദ് അബ്ബാസലി ശിഹാബ് തങ്ങള്‍ അധ്യക്ഷനായി. അബ്ദുസ്സമദ് പൂക്കോട്ടൂര്‍, കാടാമ്പുഴ മൂസ ഹാജി, സയ്യിദ് കെ.കെ.എസ് തങ്ങള്‍ വെട്ടിച്ചിറ, സയ്യിദ് ബി.എസ്.കെ തങ്ങള്‍, പി.വി മുഹമ്മദ് മൗലവി, സി.എച്ച് ത്വയ്യിബ് ഫൈസി, കാളാവ് സൈതലവി മുസ്‌ലിയാര്‍, സലീം എടക്കര, ഹസന്‍ സഖാഫി പൂക്കോട്ടൂര്‍, ശാഫി മാസ്റ്റര്‍ ആലത്തിയൂര്‍, എം.പി മുഹമ്മദ് മുസ്‌ലിയാര്‍ കടുങ്ങല്ലൂര്‍, ആനമങ്ങാട് മുഹമ്മദ് കുട്ടി ഫൈസി, സി.കെ ഹിദായത്തുല്ലാഹ് സംസാരിച്ചു.

കര്‍മനിരതനായ മഹാപണ്ഡിതന്‍: ഐ.എന്‍.എല്‍
മലപ്പുറം: കര്‍മനിരതനായ മഹാപണ്ഡിതനായിരുന്നു ബാപ്പു മുസ്‌ലിയാരെന്നും വിജ്ഞാനം സമൂഹ നന്മയ്ക്കുവേണ്ടി വ്യയംചെയ്ത പണ്ഡിതശ്രേഷനാണ് വിടപറഞ്ഞതെന്നും ഐ.എന്‍.എല്‍ ജില്ലാ ഭാരവാഹികള്‍ അനുശോചനക്കുറിപ്പില്‍ പറഞ്ഞു. സംസ്ഥാന ഹജ്ജ് കമ്മിറ്റി ചെയര്‍മാനെന്ന നിലയില്‍ കുറ്റമറ്റ രീതിയില്‍ തന്റെ കര്‍തവ്യം നിര്‍വഹിക്കാന്‍ അദ്ദേഹത്തിനു കഴിഞ്ഞിരുന്നു. അദ്ദേഹത്തിന്റെ വിയോഗംമൂലം കേരളീയ മുസ്‌ലീങ്ങള്‍ക്ക് തലയെടുപ്പുള്ള പണ്ഡിതനെയാണ് നഷ്ടമായിരിക്കുന്നതെന്നും ജില്ലാ പ്രസിഡന്റ് സി.എച്ച് മുസ്തഫ, ജനറല്‍ സെക്രട്ടറി പി.എ സമദ്, മീഡിയാ സെക്രട്ടറി സി.പി അബ്ദുല്‍ വഹാബ് എന്നിവര്‍ പറഞ്ഞു.