കോഴിക്കോട്: കരിപ്പൂര്‍ വിമാനത്താവളത്തില്‍ വലിയ വിമാനങ്ങള്‍ സര്‍വിസ് തുടങ്ങണമെന്നും ഹജ്ജ് എമ്പാര്‍ക്കേഷന്‍ കേന്ദ്രം കരിപ്പൂരിലേക്കു തിരികെക്കൊണ്ടുവരണമെന്നും കാലിക്കറ്റ് ചേംബര്‍ ഓഫ് കൊമേഴ്‌സ് ആവശ്യപ്പെട്ടു.
പ്രതികൂല കാലാവസ്ഥയില്‍ റണ്‍വേ കാണാന്‍ സഹായിക്കുന്നതിനു പുതുതായി സ്ഥാപിച്ച ഐ.എല്‍.എസ് ഉടന്‍ പ്രവര്‍ത്തനക്ഷമമാക്കുന്നത് സ്വാഗതാര്‍ഹമാണെന്നും ഭാരവാഹികള്‍ അഭിപ്രായപ്പെട്ടു. പുതിയ തിരുവനന്തപുരം-കാലിക്കറ്റ്-ഖത്തര്‍ സര്‍വിസ് പ്രതിദിന സര്‍വിസ് ആക്കണമെന്നും നിര്‍ത്തലാക്കിയ കാലിക്കറ്റ്-കോയമ്പത്തൂര്‍-മുംബൈ- ഡല്‍ഹി സര്‍വിസ് പുനരാരംഭിക്കണമെന്നും ചേംബര്‍ അഭിപ്രായപ്പെട്ടു.
പ്രസിഡന്റ് ഐപ്പ് തോമസ് അധ്യക്ഷനായി. ഡോ. എ.എം ഷരീഫ്, ഡോ. കെ. മൊയ്തു, സി. ചാക്കുണ്ണി, ജോഹര്‍ ടോംടണ്‍, എന്‍. റിയാസ് സംസാരിച്ചു.