ന്യൂഡല്‍ഹി: മുന്‍ ബി.ജെ.പി എം.പിയും ക്രിക്കറ്റ് താരവുമായിരുന്ന നവജ്യോത് സിങ് സിദ്ദു ഉടന്‍ കോണ്‍ഗ്രസില്‍ ചേരും. ഇതുമായി ബന്ധപ്പെട്ട കാര്യങ്ങള്‍ ചര്‍ച്ച ചെയ്യാനായി അദ്ദേഹം കോണ്‍ഗ്രസ് വൈസ് പ്രസിഡന്റ് രാഹുല്‍ ഗാന്ധിയുമായി കൂടിക്കാഴ്ച നടത്തി. അടുത്ത മാസം നാലിനു നടക്കുന്ന പഞ്ചാബ് നിയമസഭാ തെരഞ്ഞെടുപ്പിനു മുന്‍പു തന്നെ കോണ്‍ഗ്രസില്‍ ചേരുമെന്നാണു പ്രതീക്ഷിക്കപ്പെടുന്നത്.
ഇന്നലെ വൈകിട്ടു മൂന്നരയോടെയാണ് നവജ്യോത് സിങ് സിദ്ദു രാഹുലിനെ കണ്ടത്. അരമണിക്കൂര്‍ നേരം ഇരുവരും ചര്‍ച്ച നടത്തിയതായും കോണ്‍ഗ്രസില്‍ ചേരുന്നതിനെ കുറിച്ചു ആലോചിച്ചതായും ബന്ധപ്പെട്ട വൃത്തങ്ങള്‍ അറിയിച്ചു. 2004ലും 2014ലും ബി.ജെ.പിയുടെ രാജ്യസഭാ എം.പിയായ സിദ്ദു ലോകസഭാ സീറ്റുമായി ബന്ധപ്പെട്ട് ഉടലെടുത്ത തര്‍ക്കത്തെ തുടര്‍ന്നാണ് പാര്‍ട്ടി വിട്ടത്.