അമ്പൂരി: പൊട്ടിപൊളിഞ്ഞ് വെള്ളം കയറുന്ന വള്ളത്തില്‍ ജീവന്‍ പണയം വച്ച് സ്‌കൂളിലേക്കു പോകുന്ന ആദിവാസി കുട്ടികള്‍. ചീങ്കണ്ണി വായും പിളര്‍ന്നിരിക്കുന്ന നെയ്യാര്‍ ജല സംഭരണി വരുന്ന അഗസ്ത്യമലയിലെ കുട്ടികള്‍ പഠിക്കാന്‍ പോകുന്നത് ഇങ്ങനെയൊക്കെയാണ്. ഇവിടെ കുട്ടുകള്‍ക്ക് പഠനവും ജീവന്‍മരണ പോരാട്ടമാകുകയാണ്.
പുറം നാട്ടില്‍ നിന്നും 15 കിലോമീറ്റര്‍ അകലെ കൊമ്പൈക്കാണി എന്ന നെയ്യാര്‍കടവിലെ യാത്രക്കാരില്‍ അധികവും ആദിവാസികളായ കാണിക്കാരാണ്. അവിടെ നിന്നും 20ഉം 25 ഉം കിലോമീറ്റര്‍ ഉള്ളില്‍ താമസിക്കുന്ന കാണിക്കാര്‍ക്ക് പുറം നാട്ടില്‍ എത്തണമെങ്കില്‍ ഇത്രയധികം ദൂരം നടന്ന് നെയ്യാര്‍ സംഭരണി പ്രദേശത്ത് എത്തിവേണം കടത്തുവള്ളത്തില്‍ കയറാന്‍. കനത്ത മഴയത്ത് നിറഞ്ഞു കവിഞ്ഞ അണക്കെട്ടിലൂടെയാണ് പാതിതകര്‍ന്ന വള്ളത്തില്‍ കുട്ടികളേയും കൊണ്ടുപോകുന്നത്.
പഞ്ചായത്ത് വക വള്ളമാണ് കടത്തിനായി ഉപയോഗിക്കുന്നത്. വള്ളമാകട്ടെ പഴക്കമേറിയതും. തടി ദ്രവിച്ച് വള്ളത്തിന്റെ മിക്ക ഭാഗങ്ങളും അടര്‍ന്നു വീണുകൊണ്ടിരിക്കുകയാണ്. മഴയത്തും വെയിലത്തും യാത്രക്കാരെയും കൊണ്ട് കടത്തുമ്പോള്‍ വള്ളത്തിന്റെ അവസ്ഥ ദയനീയമാണ്. രാത്രിയായലും പകലും കാണിക്കാര്‍ക്ക് യാത്രക്കുള്ള വഴി ഈ വള്ളം മാത്രമാണ്. കടത്തുകാരനായ ശീതങ്കന്‍കാണിയാണ് യാത്രക്ക് എല്ലാവരുടേയും ആശ്രയം. ഏതാണ്ട് പത്താള്‍ പൊക്കമുള്ള സംഭരണിയിലെ ജലവിതാനവും കടന്ന് അക്കരെയിക്കരെ എത്തിക്കുമ്പോള്‍ ശീതങ്കന്‍ ഓരോ തവണയും ദൈവത്തിന് നന്ദിപറയുകയാണ് ചെയ്യുന്നത്.
ഇക്കാര്യങ്ങള്‍ പഞ്ചായത്തില്‍ പലതവണ അറിയിച്ചു. പട്ടികവര്‍ഗ വകുപ്പിലും നിവേദനങ്ങളും പരാതികളും നല്‍കി. അധിക്യതര്‍ സ്ഥലത്തെത്തി വള്ളത്തിന്റെ സ്ഥിതിയും കണ്ടറിഞ്ഞു. എന്നാല്‍ തുടര്‍ നടപടികള്‍ മാത്രം ഉണ്ടായില്ല. സുകൂള്‍ തുറക്കാന്‍ ദിവസങ്ങള്‍ മാത്രമുള്ളപ്പോഴും അധികൃതര്‍ ഒരു നടപടിയും സ്വീകരിക്കുന്നില്ല. ദുരന്തം ഉണ്ടാകുമ്പോള്‍ മാത്രം ചിന്തിക്കുന്ന അധികൃതര്‍ ഈ ദുരവസ്ഥ കാണാതിരിക്കുകയാണ് ചെയ്യുന്നത്.