കണ്ണൂര്‍: നദീതടങ്ങളില്‍ കലയുടെ മാമാങ്കത്തിനു കൊടിയേറി. ഊട്ടുപുരയില്‍ ആദ്യം അമ്പലപ്പുഴ പാല്‍പായസത്തിന്റെ അതിമധുരം. പിന്നാലെ കലോത്സവ മേളാങ്കത്തിനു കൊടിയേറ്റം. തുടര്‍ന്നു വിഭവ സമൃദ്ധമായ ഉച്ചഭക്ഷണം. പിന്നെ കലാപൂരത്തിന്റെ വരവറിയിച്ച് സെന്റ് മൈക്കിള്‍സ് സ്‌കൂള്‍ ഗ്രൗണ്ടില്‍ നിന്നു വര്‍ണ വൈവിധ്യതാളമേളങ്ങളുടെ ഘോഷയാത്ര. നാടന്‍കലകളും നിശ്ചല ദൃശ്യങ്ങളും ഘോഷയാത്രയ്ക്കു പൊലിമ പകര്‍ന്നു.

കണ്ണൂരിന്റെ ഓരോ മണല്‍തരികളെയും പുളകമണിയിച്ച ഘോഷയാത്ര പ്രധാന വേദിയായ നിളാതടത്തില്‍ എത്തിയതോടെ കലോത്സവം ഔപചാരികമായി ഉദ്ഘാടനം ചെയ്തതായി മുഖ്യമന്ത്രി പിണറായി വിജയന്‍ പ്രഖ്യാപിച്ചു. ഇനി കണ്ണൂരിന്റെ മനസ് ഒരാഴ്ചക്കാലം കൗമാര പ്രതിഭകളുടെ നൃത്ത ലാസ്യ സംഗീത ഇശലുകളാല്‍ മുഖരിതമാകും. നഗരത്തിലെ 20 വേദികളിലാണ് ഇനി കണ്ണൂരിന്റെ മനസുണ്ടാവുക..