മെക്‌സിക്കോ സിറ്റി: മെക്‌സിക്കോയിലെ പ്‌ളായ ദെല്‍ കാര്‍മന്‍ റിസോര്‍ട്ടിലെ നിശാക്ലബിലുണ്ടായ വെടിവയ്പ്പില്‍ നാലു വിദേശികളടക്കം അഞ്ചു പേര്‍ കൊല്ലപ്പെട്ടു. 15ഓളം പേര്‍ക്ക് പരുക്കറ്റിട്ടുണ്ട്. റിസോര്‍ട്ടിലെ ബി.പി.എം ഇലക്ട്രോണിക് മ്യൂസിക് ഫെസ്റ്റിവലിനിടെയായിരുന്നു ആക്രമം. മരിച്ച വിദേശികള്‍ രണ്ടു കാനഡക്കാരും ഒരു ഇറ്റലിക്കാരനുമാണ്. ക്ലബില്‍ എത്തിയ ആക്രമി പൊടുന്നനെ തോക്കെടുത്ത് വെടിയുതിര്‍ക്കുകയായിരുന്നു. കൊല്ലപ്പെട്ടവരില്‍ മൂന്നു പേര്‍ സുരക്ഷ ജീവനക്കാരാണ്. മെക്‌സിക്കോയിലെ പ്രമുഖ ഫെസ്റ്റിവലായ പരിപാടിയില്‍ പങ്കെടുക്കാന്‍ വിദേശ രാജ്യങ്ങളില്‍ നിന്ന് നിരവധി പേരാണ് എത്തിയത്. പ്രാദേശിക സമയം പുലര്‍ച്ച മൂന്നു മണിയോടെയായിരുന്നു സംഭവം. ആക്രമണത്തിന് പിന്നില്‍ ആരാണെന്ന് വ്യക്തമല്ല.