കരുവാരക്കുണ്ട്: കൂട്ടിലങ്ങാടി എം.എസ്.പി ഗ്രൗണ്ടില്‍ നടന്ന പാരലല്‍ കോളജ് ജില്ലാ കായിക മേളയില്‍ ജൂനിയര്‍, സീനിയര്‍ വിഭാഗങ്ങളില്‍ കരുവാരക്കുണ്ട് നളന്ദ കോളജ് ഓവറോള്‍ ചാംപ്യന്‍മാരായി. തുടര്‍ച്ചയായി ആറാം തവണയാണ് നളന്ദ കോളജ് ജില്ലാ കായിക മേളയില്‍ ഒന്നാം സ്ഥാനം നേടുന്നത്.
ജൂനിയര്‍ വിഭാഗത്തില്‍ 129 പോയിന്റും സീനിയര്‍ വിഭാഗത്തില്‍ 89 പോയിന്റും നേടിയാണ് ഒന്നാമതെത്തിയത്. ജൂനിയര്‍ വിഭാഗത്തില്‍ 52 പോയിന്റും സീനിയര്‍ വിഭാഗത്തില്‍ 55 പോയിന്റും നേടിയ തിരൂര്‍ ആര്‍ട്‌സ് കോളജിനാണ് രണ്ടാംസ്ഥാനം. ജൂനിയര്‍ വിഭാഗത്തില്‍ 49 പോയിന്റോടെ വേങ്ങര മലബാര്‍ കോളജ് മൂന്നാം സ്ഥാനം നേടി. സീനിയര്‍ വിഭാഗത്തില്‍ 32 പോയിന്റ് വീതം നേടി ഐ.യു ആര്‍ട്‌സ് കോളജും വേങ്ങര മലബാര്‍ കോളജും മൂന്നാം സ്ഥാനം പങ്കിട്ടു.
നളന്ദ കോളേജിലെ എം.പി സാഹിറയും പി. സജിതയും സീനിയര്‍ പെണ്‍കുട്ടികളുടെ വിഭാഗത്തിലും പറപ്പൂര്‍ ആര്‍ട്‌സ് കോളജിലെ ബി.എസ് ആഷിക്ക് സീനിയര്‍ ആണ്‍കുട്ടികളുടെ വിഭാഗത്തിലും വ്യക്തിഗത ചാംപ്യന്‍മാരായി. കായികമേള പാരലല്‍ കോളജ് അസോസിയേഷന്‍ സംസ്ഥാന സെക്രട്ടറി സി. മോഹനന്‍ ഉദ്ഘാടനം ചെയ്തു. സംസ്ഥാന പ്രസിഡന്റ് പി.ടി മൊയ്തീന്‍ കുട്ടി അധ്യക്ഷനായി.
ജില്ലാ പ്രസിഡന്റ് ഖാജാ മുഹിയിദ്ദീന്‍, ജില്ലാ സെക്രട്ടറി കെ. നജീബ്, സി.കെ വിമല്‍, അക്ബര്‍ ഒതുക്കുങ്ങല്‍, കെ. അഷ്‌റഫ്, ടി.കെ.എം ബഷീര്‍, പി. ഉമ്മര്‍, പി. രാജന്‍ തോമസ് സംസാരിച്ചു. ജില്ലാ ഫുട്‌ബോള്‍ മേളയില്‍ വേങ്ങര മലബാര്‍ കോളജിനെ പരാജയപ്പെടുത്തി പറപ്പൂര്‍ ഐ.യു ആര്‍ട്‌സ് കോളജ് ചാംപ്യന്‍മാരായി. ഒതുക്കുങ്ങല്‍ കോ ഓപറേറ്റീവ് കോളജ് മൂന്നാം സ്ഥാനം നേടി. അഡ്വ. സി.കെ അബ്ദുറഹിമാന്‍ വിജയികള്‍ക്കുള്ള ട്രോഫികള്‍ വിതരണം ചെയ്തു.