നെടുങ്കണ്ടം: ഇന്ത്യയിലെ ജനാധിപത്യം തകര്‍ത്ത് ഫാസിസത്തിന് വളരാനുള്ള അവസരമൊരുക്കുകയാണ് മോദിയുടെ കേന്ദ്രസര്‍ക്കാര്‍ നയമെന്നും മതമൈത്രിയും സാമൂദായിക സൗഹാര്‍ദ്ദവും തകര്‍ക്കാനുള്ള ഗൂഢ നീക്കങ്ങളെ ജനാധിപത്യ മാര്‍ഗ്ഗങ്ങളിലൂടെ ചെറുത്ത് തോല്‍പ്പിക്കണമെന്നും മുസ്‌ലിം ലീഗ് സംസ്ഥാന സെക്രട്ടറി ടി.എം സലിം ആഹ്വാനം ചെയ്തു.
ഉടുമ്പഞ്ചോല നിയോജകമണ്ഡലം മുസ്‌ലിംലീഗ് നേതൃയോഗം നെടുങ്കണ്ടത്ത് ഉദ്ഘാടനം ചെയ്യുകയായിരുന്നു അദ്ദേഹം. നോട്ട് നിരോധനത്തിലൂടെയും റേഷന്‍ വിതരണം തടഞ്ഞും വിവിധ പെന്‍ഷനുകള്‍ വെട്ടിക്കുറച്ചും മോദി സര്‍ക്കാര്‍ ജനങ്ങളെ ദുരിതത്തിലേക്ക് തള്ളിവിട്ടിരിക്കുകയാണ്.
ആര്‍.എസ്.എസിന്റെയും സംഘ്പരിവാറിന്റെയും പിണിയാളായി നരേന്ദ്രമോദി പ്രവര്‍ത്തിക്കുകയാണെന്നും അദ്ദേഹം പഞ്ഞു. നിയോജകമണ്ഡലം മുസ്‌ലിംലീഗ് പ്രസിഡന്റ് കെ.എം കാസിംകുട്ടിയുടെ അധ്യക്ഷതയില്‍ നടന്ന നേതൃയോഗത്തില്‍ ജില്ലാ പ്രസിഡന്റ് കെ.എം.എ ഷുക്കൂര്‍ മുഖ്യപ്രഭാഷണം നടത്തി.
ജില്ലാ ജന. സെക്രട്ടറി എം.എസ് മുഹമ്മദ് ആമുഖപ്രഭാഷണം നടത്തി. ജില്ലാ ട്രഷറര്‍ ഫൈസല്‍ കമാല്‍ , സംസ്ഥാന കൗണ്‍സില്‍ അംഗം പി.യു ഇബ്രാഹിംകുട്ടി ഹാജി, പി.എച്ച് സെയ്തുമുഹമ്മദ് ഹാജി, പി.യു മുഹമ്മദലി റാവുത്തര്‍, ടി.എം ബാപ്പുട്ടി, ടി.എസ് മുഹമ്മദ്, അനസ് ഇബ്രാഹിം, റഷീദ് ഇബ്രാഹിംകുട്ടി, കെ.കെ മജീദ്, കെ.കെ സലിം, കെ.എ ലിയാഖത്ത്, കെ.എം സുധീര്‍, ഇ.എ ജമാല്‍, സി.എ ഷരീഫ് എന്നിവര്‍ സംസാരിച്ചു.