ന്യൂഡല്‍ഹി: പ്രധാനമന്ത്രി നരേന്ദ്ര മോദിയെ രൂക്ഷമായി വിമര്‍ശിച്ച് വീണ്ടും ശിവസേന രംഗത്ത്. നോട്ട് പിന്‍വലിക്കല്‍ നടപടി ഇന്ത്യന്‍ സമ്പത്ത് വ്യവസ്ഥയെ ഹിരോഷിമയും നാഗസാക്കിയുമാക്കി മാറ്റിയെന്ന് പറഞ്ഞാണ് ശിവസേന രംഗത്തെത്തിയത്. നോട്ട് പിന്‍വലിക്കല്‍ നടപടി ഒരു ആറ്റംബോംബ് ആയിരുന്നു. രണ്ടാംലോക മഹായുദ്ധകാലത്ത് ജപ്പാനിലെ ഹിരോഷിമയിലും നാഗസാക്കിയിലും അമേരിക്ക ബോംബിട്ട പോലെയായി നോട്ട് നിരോധനം. റിസര്‍വ് ബാങ്ക് ഗവര്‍ണറുടെ ഉപദേശം കേള്‍ക്കാന്‍ പോലും മോദി ചെവികൊടുക്കുന്നില്ലെന്നും ശിവസേന തുറന്നടിച്ചു. മുഖപത്രമായ സാംമ്‌നയിലൂടെയാണ് ശിവസേന മോദിക്കെതിരേ ആഞ്ഞടിച്ചത്. മോദി ഏകപക്ഷീയമായാണ് തീരുമാനമെടുക്കുന്നത്. ആര്‍ക്കും ചെവികൊടുക്കാന്‍ അദ്ദേഹം തയാറാകുന്നില്ലന്നും ശിവസേന കുറ്റപ്പെടുത്തി. കാഴ്ചയും കേള്‍വിയുമില്ലാത്ത തത്തകളെ മന്ത്രിസഭയിലേക്ക് തെരഞ്ഞെടുക്കന്നത് പോലെയാണ് മോദി റിസര്‍വ് ബാങ്ക് ഗവര്‍ണറെ തെരഞ്ഞെടുത്തത്. എന്‍.ഡി.എയുടെ പ്രധാന സഖ്യകക്ഷിയായ ശിവസേന നേരത്തെയും മോദിയുടെ നോട്ട് നിരോധന നടപടിയെ നിശിതമായി വിമര്‍ശിച്ച് രംഗത്തു വന്നിരുന്നു.