കൊച്ചി: 1.105 കിലോ ഗ്രാം കഞ്ചാവുമായി വെസ്റ്റ് ബംഗാള്‍ സ്വദേശി മജിബാര്‍ റഹ്മാന്‍ എന്നയാളെ അമ്പലമേട് പൊലിസ് അറസ്റ്റ് ചെയ്തു. കരിമുകള്‍ ഭാഗത്ത് പള്ളിമുകള്‍ ജങ്ഷനു പടിഞ്ഞാറുവശം സോമില്‍ റോഡില്‍ കഞ്ചാവ് വില്‍പ്പനക്കായി ഒരാള്‍ നില്‍ക്കുന്നുണ്ടെന്ന വിവരം ലഭിച്ചതിനെ തുടര്‍ന്ന് നടത്തിയ പരിശോധനയിലാണ് ഇയാള്‍ പിടിയിലായത്.
കരിമുകള്‍ ഭാഗത്ത് അന്യസംസ്ഥാന തൊഴിലാളികള്‍ക്കിടയില്‍ മയക്ക് മരുന്ന് ഉപയോഗവും വില്‍പ്പനയും നടക്കുന്നുണ്ടെന്ന വിവരത്തിന്റെ അടിസ്ഥാനത്തില്‍ പൊലിസിന്റെ നിരീക്ഷണം ശക്തമാക്കിയതിന്റെ ഫലമായിട്ടാണ് പ്രതിയുടെ അറസ്റ്റ്. തൃക്കാക്കര അസി. കമ്മിഷണര്‍ ബിനോയുടെ നിര്‍ദേശാനുസരണം ഹില്‍പ്പാലസ് സര്‍ക്കിള്‍ ഇന്‍സ്‌പെക്ടര്‍ ഷിജുവിന്റെ നേതൃത്വത്തിലുള്ള സംഘമാണ് പ്രതിയെ അറസ്റ്റ് ചെയ്തത്.
അമ്പലമേട് പൊലിസ് സ്റ്റേഷന്‍ സബ് ഇന്‍സ്‌പെക്ടര്‍ മധു സ്റ്റേഷനിലെ സീനിയര്‍ സി.പി.ഒമാരായ മണി, വിനയ് വാസു, സി.പി.ഒമാരായ ബാബു, അനീഷ്, രമേശ്, സുമേഷ്, മനീഷ് എന്നിവരും സംഘത്തിലുണ്ടായിരുന്നു.
പ്രതിക്ക് കഞ്ചാവ് എത്തിച്ചുകൊടുത്ത ഒഡീഷ സ്വദേശിക്കായുള്ള അന്വേഷണം നടന്നുവരുന്നു. കോടതിയില്‍ ഹാജരാക്കിയ പ്രതിയെ 14 ദിവസത്തേക്ക് റിമാന്‍ഡ് ചെയ്തു.