കുമ്പള(കാസര്‍കോട്): ജീവന്‍ നിലനിര്‍ത്താന്‍ ഒരു നേരത്തെ മരുന്നിനായി നെട്ടോട്ടമോടുന്ന ഹൃദ്രോഗിക്ക് ഖാദി ബോര്‍ഡ് വക ജപ്തി നോട്ടിസ്. വായ്പ തിരിച്ചടച്ചില്ലെന്ന് കാണിച്ച് ബന്തിയോട് ഭഗവതി സ്വദേശി മാധവ ആചാരി (78)യുടെ കുടുംബത്തിനാണ് ഖാദി ബോര്‍ഡ് ജപ്തി നോട്ടിസ് നല്‍കിയത്.
പത്തുവര്‍ഷം മുന്‍പ് ആചാരി ഖാദി ബോര്‍ഡില്‍ നിന്നും പതിനായിരം രൂപ വായ്പ എടുത്തിരുന്നു. ഇതിന്റെ കുടിശ്ശികയായി 65,000 രൂപയോളം അടച്ചു തീര്‍ത്തിരുന്നുവെന്ന് മാധവ ആചാരി പറയുന്നു. ഇതിനിടെയാണ് കഴിഞ്ഞ ദിവസം അധികൃതര്‍ ജപ്തി നോട്ടിസുമായി വീട്ടിലെത്തിയത്.
ഹൃദ്രോഗിയായ ഇയാള്‍ക്ക് ഇതിനകം മൂന്നു ശസ്ത്രക്രിയ കഴിഞ്ഞു. ഇപ്പോള്‍ എല്ലും തോലുമായി അവശനിലയില്‍ കിടപ്പിലാണ്. ഭാര്യ ഓമന മൂന്ന് വര്‍ഷം മുന്‍പ് മരണപ്പെട്ടു.
രണ്ട് പെണ്‍മക്കളും ഒരു മകനുമാണ് ഉള്ളത്. തകര്‍ന്ന് വീഴാറായ വീട്ടിലാണ് മാധവ ആചാരിയും കുടുംബവും കഴിയുന്നത്. ചികിത്സാ ചെലവിന് മാത്രം മാസം നാലായിരം രൂപയോളം വേണം.
തുച്ഛ ശമ്പളത്തിന് രണ്ട് പെണ്‍മക്കള്‍ സ്വകാര്യ ആശുപത്രിയില്‍ തൂപ്പ് ജോലി ചെയ്യുന്നതിനാലാണ് പട്ടിണിയില്ലാതെ കഴിയുന്നത്.
റേഷന്‍ കാര്‍ഡ് പോലും സ്വന്തമായി ഇല്ലാത്ത ഇദ്ദേഹത്തിന് വാര്‍ധക്യ പെന്‍ഷനും ഇതുവരെ ലഭിച്ചിട്ടില്ല.
ഈ കുടുംബത്തെ രക്ഷിക്കാന്‍ അധികൃതര്‍ ഇടപെടുമെന്ന പ്രതീക്ഷയിലാണ് ഈ കുടുംബം .