ഡിസംബര്‍ 31ന് കണ്ണൂര്‍ പാറക്കണ്ടിയിലുള്ള ഔട്ട്‌ലെറ്റില്‍ 67.91 ലക്ഷം രൂപയുടെ മദ്യവില്‍പനയാണ് നടന്നത്
കണ്ണൂര്‍: ഇത്തവണത്തെ ക്രിസ്മസ്-പുതുവത്സര ആഘോഷത്തിന്റെ ഭാഗമായി സംസ്ഥാനത്ത് മദ്യവില്‍പ്പനയില്‍ വന്‍ വര്‍ധനവ്. കുടിയില്‍ ഒന്നാംസ്ഥാനം കണ്ണൂര്‍ കരസ്ഥമാക്കുകയും ചെയ്തു. 480.14 കോടി രൂപയുടെ മദ്യമാണ് ബെവ്‌കോ സംസ്ഥാനത്ത് വിറ്റഴിച്ചത്. മുന്‍ വര്‍ഷം 402.35 കോടി രൂപയെ മറികടന്നാണ് പുതിയ റെക്കോര്‍ഡ്. സംസ്ഥാനത്ത് ബിവറേജസ് കോര്‍പ്പറേഷനു കീഴില്‍ ഇത്തവണ ഏറ്റവും കൂടുതല്‍ മദ്യവില്‍പ്പന കണ്ണൂരിലാണ്. ഡിസംബര്‍ 31ന് കണ്ണൂര്‍ പാറക്കണ്ടിയിലുള്ള ഔട്ട്‌ലെറ്റില്‍ 67.91 ലക്ഷം രൂപയുടെ മദ്യവില്‍പനയാണ് നടന്നത്. എറണാകുളം പാലാരിവട്ടത്ത് 66.21 ലക്ഷം രൂപയുടെയും കൊപ്പത്ത് 62.14 ലക്ഷം രൂപയുടെയും ഇരിങ്ങാലക്കുടയില്‍ 61 ലക്ഷം രൂപയുടെ മദ്യവുമാണ് വിറ്റത്. മാഹിയില്‍ അനൗദ്യോഗിക കണക്കുകള്‍ പ്രകാരം പുതുവത്സരത്തലേന്ന് രണ്ടേക്കാല്‍ കോടി രൂപയുടെ മദ്യമാണ് വിറ്റഴിച്ചത്. സാധാരണ ദിവസങ്ങളില്‍ ശരാശരി ഒരു കോടിയാണ് മാഹിയിലെ കച്ചവടം. 62 മദ്യശാലകളാണ് മാഹിയിലുള്ളത്.