മഞ്ചേശ്വരം: മബായാര്‍പദവ് സുന്നക്കട്ടയില്‍ പൊട്ടക്കിണറ്റില്‍ യുവാവിനെ കൊലപ്പെടുത്തി കിണറ്റില്‍ തള്ളിയ നിലയില്‍ കണ്ടെത്തി. കിണറില്‍ നിന്നും മൃതദേഹം പുറത്തെടുക്കാത്തതിനാല്‍ കൊല്ലപ്പെട്ട യുവാവ് ആരാണെന്ന് വ്യക്തമായിട്ടില്ല.

25 നും 30 നും ഇടയില്‍ പ്രായമുണ്ടാകുമെന്നാണ് നിഗമനം. കൊലപാതകമാണെന്ന് പൊലിസ് ഏതാണ്ട് ഉറപ്പാക്കിയിട്ടുണ്ട്. പരുക്കേറ്റു മുഖത്ത് രക്തം കട്ടക്കെട്ടി കിടക്കുന്ന നിലയിലാണ് മൃതദേഹം. ഇന്നുവൈകുന്നേരമാണ് നാട്ടുകാര്‍ മൃതദേഹം കണ്ടെത്തിയത്.

ചൊവ്വാഴ്ച അര്‍ധരാത്രിയോടെ ഈ പ്രദേശത്ത് വച്ച് ഒരാളുടെ നിലവിളി കേട്ടതായി നാട്ടുകാര്‍ പറയുന്നു. സമീപത്ത് തന്നെ ഓംനി വാന്‍ തകര്‍ക്കപ്പെട്ട് ഉപേക്ഷിച്ച നിലയിലും കണ്ടെത്തിയിട്ടുണ്ട്. ഇതു ശ്രദ്ധയില്‍പെട്ട നാട്ടുകാര്‍ സന്ധ്യയോടെ തിരച്ചില്‍ നടത്തിയപ്പോഴാണ് പൊട്ടക്കിണറ്റില്‍ യുവാവിന്റെ മൃതദേഹം കണ്ടെത്തിയത്. പിന്നീട് നാട്ടുകാര്‍ വിവരം പൊലീസിലറിയിക്കുകയായിരുന്നു. വിവരമറിഞ്ഞ് രാത്രി 9.30 മണിയോടെ മഞ്ചേശ്വരം എസ്.ഐ പ്രമോദിന്റെ നേതൃത്വത്തിലുള്ള പൊലീസ് സംഘം സ്ഥലത്തെത്തിയിട്ടുണ്ട്.

വിശദമായ പരിശോധനയ്ക്കുശേഷമേ എന്തെങ്കിലും പറയാന്‍ കഴിയുകയുള്ളൂവെന്ന് പൊലീസ് പറഞ്ഞു. നാളെ രാവിലെ പൊലീസ് നായയും വിരലടയാള വിദഗ്ദരും എത്തിയ ശേഷം രാവിലെ മാത്രമേ ഇന്‍ക്വസ്റ്റ് നടപടികള്‍ തുടങ്ങുകയുള്ളുവെന്ന്  പൊലീസ് അറിയിച്ചു.