പുതുനഗരം: അനിയന്ത്രിതമായി കുഴല്‍കിണര്‍ കുഴിക്കുന്നതിനാല്‍ പൊതുകിണറുകള്‍ വറ്റുന്നുവെന്നാരോപിച്ച് നാട്ടുകാര്‍ രംഗത്ത്. പുതുനഗരം, കൊടുവായൂര്‍, പട്ടഞ്ചേരി, വടവന്നൂര്‍, പെരുവെമ്പ് എന്നീ പഞ്ചായത്തുകളില്‍ അനിയന്ത്രിയമായി കുഴല്‍കിണറുകള്‍ കുഴിച്ചതിനാല്‍ ഏഴിലധികം പൊതുകിണറുകള്‍ കുടിവെള്ളത്തിന്റെ നിരപ്പ് താഴ്ന്ന് ഉപയോഗിക്കാന്‍ പറ്റാതായെന്നാണ് പരാതി.
പുതുനഗരം വിരിഞ്ഞിപാടത്ത്് അരനൂറ്റാണ്ടായി വറ്റാത്ത് പൊതുകിണര്‍ സമീപപ്രദേശങ്ങളില്‍ കുഴല്‍കിണറുകള്‍ വ്യാപകമായി നിര്‍മ്മിച്ചതിനാല്‍ വറ്റുവരണ്ടത് നാട്ടുകാരുടെ കുടിവെള്ളക്ഷാമം ഇരട്ടിയാക്കുന്നു. പൊതുടാപ്പിലും കുടിവെള്ള പദ്ധതികളിലും വെള്ളം ഇല്ലാതായതോടെ പൊതുകണറിനെ ആശ്രയിച്ച വിരിഞ്ഞിപാടത്തുകാര്‍ക്ക് കുഴല്‍കിണറുകള്‍ കൂടുതല്‍ കുഴിച്ചതിനാല്‍ ഉള്ളവെള്ളവും ഇല്ലാതായത് ഇരുട്ടടിയായിമാറി.
ഇതേ രീതിയില്‍ കൊടുവായൂര്‍, പെരുവെമ്പ് പഞ്ചായത്തുകളിലും പൊതുകണറുകള്‍ക്കുസമീപ പ്രദേശങ്ങളില്‍ കുഴല്‍കിണറുകള്‍ സ്ഥാപിച്ചതിനാല്‍ വെള്ളമില്ലാതായ പൊതുകിണറുകള്‍ നോക്കുകിത്തിയായിമാറിയിരിക്കുകയാണ്.
പൊതുകിണറുകള്‍ ഉള്ള പ്രദേശങ്ങള്‍ക്കുസമീപങ്ങളില്‍ കുഴല്‍കിണറുകള്‍ സ്ഥാപിക്കാതിരിക്കുവാന്‍ സര്‍ക്കാര്‍ നടപടിയെടുക്കണമെന്നാണ് നാട്ടുകാരുടെ ആവശ്യം.
മാലിന്യങ്ങള്‍ അടിഞ്ഞുകൂടിയ പൊതുകിണറുകളുടെ അറ്റകുറ്റപണികള്‍ നടത്തി ശുചീകരണപ്രവര്‍ത്തനങ്ങള്‍ നടത്തണമെന്നും നാട്ടുകാര്‍ ആവശ്യപെട്ടു.