ചിറ്റൂര്‍: കാലവര്‍ഷം കൈവിട്ടതോടെ ചിറ്റൂര്‍ താലൂക്കിലെ 56 തടയണകളിലെയും ജലനിരപ്പ് താഴുന്നു. 7500 വീടുകളിലേക്കുള്ള കുടിവെള്ളത്തിനും 200 പൊതു ടാപ്പുകളിലൂടെയുമുള്ള കുടിവെള്ള വിതരണം താറുമാറാകും.
പറമ്പിക്കുളം-ആളിയാര്‍ കരാറുപ്രകാരം ലഭിക്കുന്ന വെള്ളം നിലയ്ക്കുന്നതോടെ തടയിണകളും കാലിയാകും. ചിറ്റൂര്‍ പുഴയില്‍ നിന്നും രണ്ടു പദ്ധതികളിലായി മാത്രം ദിനംപ്രതി 35 ലക്ഷം ലിറ്റര്‍ ജലമാണ് കുടിവെള്ളമായി വിതരണം നടത്തുന്നത്. കൂടാതെ പെരുങ്ങോട്ടുകുറുശ്ശി വരെയുള്ള 19 പഞ്ചായത്തുകളിലേക്കുള്ള കുടിവെള്ളവും ഈ തടയിണകളിലെ ജലശേഖരത്തില്‍നിന്നും ലഭ്യമാക്കണം.
പുഴകളൊഴുകുന്ന ഗ്രാമങ്ങളിലെ കിണറുകളും കൈതോടുകളിലുമുള്ള നീരുറവകര്‍ സംരക്ഷിക്കാനായി നിര്‍മിച്ച തടയണകള്‍ ഇന്ന് കുടിവെള്ളത്തിനായി വഴിമാറിയിരിക്കുന്നു. എന്നാല്‍ ചിറ്റൂര്‍പുഴ മൈനര്‍ ഇറിഗേഷന്റെ കീഴില്‍ 56 തടയണകളിലൂടെയുള്ള ജലക്രമീകരണം കാലവര്‍ഷമോ തമിഴ്‌നാടോ കനിഞ്ഞാലെ സാധ്യമാകൂ.
പുഴകളില്‍ പത്തും പതിനഞ്ചും വര്‍ഷങ്ങളായി നിര്‍മിച്ച തടയണകള്‍ ഒഴുകുയെത്തുന്ന മാലിന്യങ്ങളും ചളിയും നിറഞ്ഞ് സംഭരണ ശേഷിയും നഷ്ടപ്പെട്ടിരിക്കുന്നു. ഇത്രയും വര്‍ഷമായി ഒരിക്കല്‍ പോലും വൃത്തിയാക്കിയിട്ടുമില്ല.
കോരയാര്‍, വരട്ടയാര്‍, ചിറ്റൂര്‍ എന്നി പുഴകളാണ് പ്രധാന ജലശ്രോതസുകളെങ്കിലും കോറയാറും വരട്ടയാറും വര്‍ഷങ്ങള്‍ക്ക് മുന്‍പു തന്നെ നിര്‍ജീവമായി കഴിഞ്ഞു.
ശേഷിച്ച ചിറ്റൂര്‍ പുഴയാണെകില്‍ പറമ്പിക്കുളം ആളിയാര്‍ അന്തര്‍സംസ്ഥാന കരാറിനെ അടിസ്ഥാനമാക്കിയാണ് ജീവിക്കുന്നത്. ഇപ്പോള്‍ തമിഴ്‌നാട് മഴകുറവെന്നും പറഞ്ഞ് ജലവിതരണം വളരെ കുറച്ചു.
കണ്ണാബ്ര, പുതുക്കോട് പഞ്ചായത്തുള്‍പ്പടെ 19 പഞ്ചായത്തുകളിലെ കുടിവെള്ളവും ചിറ്റൂര്‍ മേഖലയിലെ കാര്‍ഷിക ആവശ്യങ്ങളും ഇത്തവണ ആശങ്കയുടെ മുള്‍മുനയില്‍ തന്നെ നിലനില്‍ക്കും.