പെരുമ്പാവൂര്‍: ഓടിക്കൊണ്ടിരുന്ന ലോറിക്ക് തീപിടിച്ചു. എം.സി റോഡ് മണ്ണൂരില്‍ ഇന്നലെ രാവിലെ ഒമ്പത് മണിയോടെയാണ് സംഭവം. പെരുമ്പാവൂരില്‍ നന്നും കേരധാര കവര്‍ വെളിച്ചെണ്ണയുമായി മുവാറ്റുപുയിലേക്ക് ലോഡ് കയറ്റി പോകുകയായിരുന്നു ലോറിക്കാണ് തിപിടിച്ചത്.
മണ്ണൂര്‍ പെട്രോള്‍ പമ്പിന് സമീപത്ത് എത്തിയ ലോറിയുടെ എഞ്ചിനില്‍ നിന്നും ആദ്യം പുകയുയരുകയായിരുന്നു. തുടര്‍ന്ന് അരമണിക്കൂറോളം പ്രദേശത്ത് അതിശക്തമായി പുക പടര്‍ന്നു. വാഹനത്തിന്റെ എഞ്ചിന്‍ നിര്‍ത്താന്‍ സാധിക്കാതെ വന്നതോടെ പ്രശ്‌നം ഗുരുതരമായി. ഈ സമയം ഡീസല്‍ ടാങ്കിലേക്ക് തീപടര്‍ന്നതോടെ ജനം പരിഭ്രാന്തിയിലായി.
പെട്രോള്‍ പമ്പ്, എല്‍.പി സ്‌കൂള്‍, പള്ളി എന്നിവയ്ക്ക് സമീപത്താണ് വാഹനത്തിന് തീപിടിച്ചത്. ഇതോടെ എം.സി റോഡില്‍ ഒരു മണിക്കൂറോളം ഗതാഗതം സ്തംഭിച്ചു. പെരുമ്പാവൂരില്‍ നിന്നെത്തിയ ഫയര്‍ ഫോഴ്‌സ് സംഘം അരമണിക്കൂറോളം പരിശ്രമിച്ചാണ് വാഹനത്തിന്റെ തീയണച്ചത്. തുടര്‍ന്ന് റോഡില്‍ വീണ ഡീസലും ഓയിലും കഴുകികളഞ്ഞ ശേഷമാണ് ഗതാഗതം പുസ്ഥാപിക്കാനായത്. വാഹനത്തിന്റെ എഞ്ചിന്‍ ഓവര്‍ ഹീറ്റായതാണ് അപകടത്തിന് കാരണമായതെന്ന് ഫയര്‍ ഫോഴ്‌സ് പറഞ്ഞു.