കാഞ്ഞങ്ങാട്: നിര്‍ധനരായ രോഗികളോട് അല്‍പമെങ്കിലും കാരുണ്യം കാണിക്കാന്‍ കാരുണ്യ മെഡിക്കലില്‍ മരുന്നുകളില്ല. കാഞ്ഞങ്ങാട് ജില്ലാ ആശുപത്രിയിലെ കാരുണ്യ മെഡിക്കല്‍ ഷോപ്പിലാണ് മരുന്നുകള്‍ കിട്ടാനില്ലാത്തത്.

ആശുപത്രിയിലെത്തുന്ന രോഗികള്‍ക്ക് പ്രത്യേകിച്ച് നിര്‍ധന രോഗികള്‍ക്ക് ചെറിയ നിരക്കില്‍ ആവശ്യ മരുന്നുകള്‍ ലഭ്യമാക്കുക എന്ന ലക്ഷ്യത്തോടെ തുടങ്ങിയ കാരുണ്യ മെഡിക്കല്‍ സ്റ്റോറില്‍ ആവശ്യമരുന്നുകള്‍ പോയിട്ട് അത്യാവശ്യ മരുന്നുകള്‍വരെ ഇല്ല. ഒരു മാസത്തോളമായി ഇവിടെ ഈ നില തുടരുകയാണ്. സ്വകാര്യ മെഡിക്കല്‍ ഷോപ്പുകളിലേതിനേക്കാള്‍ ഇരുപതുശതമാനം മുതല്‍ മുപ്പത്തിയഞ്ചുശതമാനം വരെ വിലകുറച്ചാണ് കാരുണ്യയില്‍ മരുന്നുകള്‍ വിറ്റിരുന്നത്. ഇക്കാരണത്താല്‍ രോഗികള്‍ പൂര്‍ണ്ണമായും ആശ്രയിച്ചിരുന്നത് ഈ മെഡിക്കല്‍ ഷോപ്പിനെയാണ്.

ഇത് സ്വകാര്യ മേഖലക്ക് തിരിച്ചടിയായത്തോടെ കാരുണ്യയില്‍ മരുന്നെത്തിക്കുന്നതിന് ആരോഗ്യവകുപ്പ് ഉദ്യോഗസ്ഥര്‍ കാര്യക്ഷമത കാണിക്കുന്നില്ലെന്ന ആക്ഷേപങ്ങളും രോഗികളില്‍ നിന്നും ഉയര്‍ന്നിട്ടുണ്ട്.

ആധുനിക രീതിയില്‍ സംവിധാനിച്ച മെഡിക്കല്‍ ഷോപ്പും അനുബന്ധ സംവിധാനങ്ങളും ഇതിനു പുറമെ ആവശ്യമായ ജീവനക്കാരും ഇവിടെ ഉണ്ട്. എന്നാല്‍ ഇവിടെ മരുന്നില്ലാത്തത് കാരണം രോഗികള്‍ക്ക് സാമ്പത്തിക ബാധ്യത അധികരിക്കാനിടയാക്കുന്നു.