കാളികാവ്: കാളികാവ് ഗ്രാമപഞ്ചായത്ത് പ്രസിഡന്റിനെതിരേയുള്ള ക്രൈംബ്രാഞ്ച്  അന്വേഷണം സി.പി.എമ്മിന്റെ രാഷ്ട്രീയ സ്വാധീനമെന്ന് മുസ്‌ലിംലീഗ്. വ്യാജരേഖ ചമച്ച് വി.പി.എ നാസര്‍ ഭൂമി തട്ടിയെടുത്തു മറിച്ചുവിറ്റെന്ന പരാതിയിലാണ് അന്വേഷണത്തിന് ഉത്തരവിട്ടിരിക്കുന്നത്.
19 വര്‍ഷം മുന്‍പു നടന്ന ഭൂമി ഇടപാടിന്റെ പേരില്‍ രാഷ്ട്രീയ സ്വാധീനമുപയോഗിച്ചു സി.പി.എം ഗ്രാമപഞ്ചായത്ത് പ്രസിഡന്റിനെ അധിക്ഷേപിക്കാനുള്ള ശ്രമമാണ് നടത്തുന്നതെന്ന് ലീഗ് ആരോപിച്ചു. പരാതിക്കാരന്റെ ഉടമസ്ഥതയിലുള്ള അരയേക്കര്‍ സ്ഥലം വി.പി.എ നാസര്‍ വാങ്ങിച്ചിരുന്നു. ഇടനിലക്കാര്‍ മുഖേന വാങ്ങിച്ച സ്ഥലം പിന്നീട് വില്‍പന നടത്തുകയും ചെയ്തു.
പരാതിയിലുള്ള ഏത് അന്വേഷണത്തേയും സ്വാഗതം ചെയ്യുന്നുണ്ടെന്നും നേതാക്കള്‍ കൂട്ടിച്ചേര്‍ത്തു. ഗ്രാമപഞ്ചായത്ത് പ്രസിഡന്റിനെ വ്യക്തിഹത്യ നടത്താനുള്ള സി.പി.എമ്മിന്റെ നീക്കത്തെ ലീഗ് ചെറുക്കുമെന്ന് പഞ്ചായത്ത് കമ്മിറ്റി പ്രസിഡന്റ്  കെ. കുഞ്ഞാപ്പ ഹാജി, സെക്രട്ടറി കെ.പി ഹൈദരലി എന്നിവര്‍ പറഞ്ഞു.