മലപ്പുറം: ഗോകുലം ഫുട്‌ബോള്‍ ക്ലബിന്റെ പരിശീലനത്തിന് ഇന്നു തുടക്കമാകും. ഫെബ്രുവരി ഒന്നിന് തുടങ്ങാനിരുന്ന പരിശീലനം ഇ. അഹമ്മദ് എം.പിയുടെ നിര്യാണത്തെ തുടര്‍ന്നാണ് മാറ്റിയത്.
ഏപ്രിലില്‍ നടക്കുന്ന കേരളാ പ്രീമിയര്‍ ലീഗിലും ജി.വി രാജ, ക്ലബ് ഫുട്‌ബോള്‍ ടൂര്‍ണമെന്റിലുമാണ് ടീം ആദ്യം കളിക്കുന്നത്. 2018ലെ ഐ ലീഗ് ടൂര്‍ണമെന്റില്‍ കേരളത്തെ പ്രതിനിധീകരിച്ച് കളിക്കുന്നതിനുള്ള ശ്രമവും ആരംഭിച്ചിട്ടുണ്ട്. മാര്‍ച്ചില്‍ നടക്കുന്ന ചടങ്ങില്‍ ടീം അംഗങ്ങളെ  ഔദ്യോഗികമായി പ്രഖ്യാപിക്കും.
ഭാവിയില്‍ സ്വന്തമായി ഗ്രൗണ്ടും ആധുനിക സൗകര്യങ്ങളും ഏര്‍പ്പെടുത്താനും ക്ലബിന് പദ്ധതിയുണ്ടെന്ന് ഗോകുലം ഗ്രൂപ്പ് ചെയര്‍മാന്‍ ഗോകുലം ഗോപാലന്‍  അറിയിച്ചു. ബിനോ ജോര്‍ജാണ് ടീമിന്റെ മുഖ്യ  പരിശീലകന്‍. മലപ്പുറം സ്വദേശി ഷാജറുദീനാണ് അസിസ്റ്റന്റ് കോച്ച്.