ബെയ്ജിങ്: ജോലിയില്‍ മിടുക്കരാണോ? എന്നാല്‍, ചൈന നിങ്ങളെ വിസയുമായി കാത്തിരിക്കുന്നു. മിടുക്കരായ ഉദ്യോഗാര്‍ഥികള്‍ക്കായി അഞ്ചുമുതല്‍ പത്തുവരെ വര്‍ഷം കാലാവധിയുള്ള മള്‍ട്ടി എന്‍ട്രി വിസയാണ് ചൈന അനുവദിക്കുന്നത്. ചൈനീസ് സര്‍ക്കാര്‍ മാധ്യമമാണ് ഇക്കാര്യം പുറത്തുവിട്ടത്.
സാങ്കേതിക വിദഗ്ധര്‍, സംരംഭകര്‍, ശാസ്ത്രജ്ഞര്‍ എന്നിവര്‍ക്കാണ് ഏറ്റവും കൂടുതല്‍ ഡിമാന്‍ഡുള്ളത്. രാജ്യത്തിന്റെ സാമ്പത്തിക- സാമൂഹിക വികസനം മുന്നില്‍ക്കണ്ട് ചൈനീസ് സര്‍ക്കാര്‍ പുതിയ പദ്ധതികള്‍ തയാറാക്കിയിട്ടുണ്ട്. ഇതിനായി വിദേശത്തുനിന്നടക്കം വിദഗ്ധരായ ഉദ്യോഗാര്‍ഥികളെ രാജ്യത്തെത്തിക്കാനാണ് ചൈന പദ്ധതിയിടുന്നത്. ഇതിന്റെ ഭാഗമായാണ് പുതിയ വിസാനയം പുറത്തിറക്കിയത്.
തുടക്കത്തില്‍ 50,000ത്തോളം വിദേശികള്‍ക്ക് ഈ പദ്ധതിയുടെ ഉപകാരം ലഭിക്കുമെന്ന് ചൈനീസ് വൃത്തങ്ങള്‍ പറഞ്ഞു. ഓണ്‍ലൈന്‍ വഴിയാണ് വിസയ്ക്ക് അപേക്ഷിക്കേണ്ടത്. വളരെ വേഗത്തില്‍ പൂര്‍ത്തീകരിക്കാവുന്ന അപേക്ഷയ്ക്ക് ചാര്‍ജ് ഈടാക്കില്ല.
ജീവിതപങ്കാളികളെയും കുട്ടികളെയും കൂടെക്കൂട്ടാനും അവസരമുണ്ട്. നൊബേല്‍ ജേതാക്കള്‍, ഒളിംപിക്‌സ് അത്‌ലറ്റുകള്‍, ലോകപ്രശസ്തമായ മ്യൂസിക്, ഫൈന്‍ ആര്‍ട്‌സ് സ്ഥാപനങ്ങളുടെ ഡയരക്ടര്‍മാര്‍ എന്നിവര്‍ക്കായി 'അതിപ്രതിഭകളായ വിദേശികള്‍' എന്ന ഒരു ഇനവും ചൈനീസ് സര്‍ക്കാര്‍ പുറത്തിറക്കിയ പുതിയ രേഖയില്‍ ഉള്‍ക്കൊള്ളിച്ചിട്ടുണ്ട്.