വേങ്ങര: പൊലിസിന്റെയും റവന്യൂ അധികൃതരുടെയും വിലക്ക് ലംഘിച്ച് കാന്തപുരം വിഭാഗം മദ്‌റസയില്‍ അതിക്രമിച്ചു കയറിയത് ഇന്നലെയും സംഘര്‍ഷത്തിനിടയാക്കി. സമസ്ത കേരള ഇസ്‌ലാം മത വിദ്യാഭ്യാസ ബോര്‍ഡിനു കീഴില്‍ പ്രവര്‍ത്തിക്കുന്ന ചേറൂര്‍ മഅ്ദനുല്‍ ഉലൂം ഹയര്‍ സെക്കന്‍ഡറി മദ്‌റസയിലാണ് ബുധനാഴ്ച്ച പുലര്‍ച്ചെ വീണ്ടും കാന്തപുരം വിഭാഗം സംഘര്‍ഷമുണ്ടാക്കിയത്. ആര്‍.ഡി.ഒ പരിശോധനക്കു വരുന്നതിനാല്‍ ഇന്നലെ മദ്‌റസ പരിസരത്തേക്ക് പ്രവേശിക്കരുതെന്ന് ഡിവൈ.എസ്.പിയുടെയും സി.ഐയുടെ പ്രത്യേക നിര്‍ദേശമുണ്ടായിരുന്നു.
ഇത് ലംഘിച്ച് പുലര്‍ച്ചെ ആറരയോടെ സംഘടിച്ച് വാതില്‍ ചവിട്ടിത്തുറന്ന് അക്രമികള്‍ അകത്തു കയറിയതാണ് പ്രശ്‌നത്തിനു കാരണമായത്.
അകത്ത് ആര്‍.ഡി.ഒ, വില്ലേജ് ഓഫിസര്‍ പരിശോധ നടത്തുന്നതിനിടെയാണ് സംഭവം. വിദ്യാര്‍ഥികളുമായി എത്തിയ ഇവര്‍ സംഘര്‍ഷാവസ്ഥ സൃഷ്ടിച്ചെങ്കിലും ആര്‍.ഡി.ഒയും പൊലിസും ചേര്‍ന്ന് പുറത്താക്കുകയായിരുന്നു.