സുല്‍ത്താന്‍ ബത്തേരി: ടൗണിനോട് ചേര്‍ന്നുള്ള ജനവാസ കേന്ദ്രവും കാട്ടാന ഭീതിയില്‍. ബത്തേരി ടൗണിന് മീറ്ററുകള്‍ മാത്രം അകലെയുള്ള കട്ടായാട് മുള്ളന്‍കുന്ന് പ്രദേശത്താണ് കഴിഞ്ഞദിവസം കാട്ടാനയിറങ്ങി നാശങ്ങളുണ്ടാക്കിയത്.
സന്ധ്യമയങ്ങിയാല്‍ സമീപത്തെ വനത്തില്‍ നിന്നും പ്രദേശത്ത് എത്തുന്ന കാട്ടാന വാഴയടക്കമുള്ള വിളകള്‍ നശിപ്പിക്കുകയാണ്. കഴിഞ്ഞ ദിവസം പ്രദേശത്ത് എത്തിയ കാട്ടാന വിളകള്‍ നശിപ്പിച്ച് വീടിനു തൊട്ടടുത്ത് നിലയുറപ്പിച്ച് ജീവനു തന്നെ ഭീഷണിയായി. വനാതിര്‍ത്തിയില്‍ കാട്ടാന പ്രതിരോധത്തിനായി ട്രഞ്ചും വൈദ്യുത കമ്പിവേലിയും സ്ഥാപിച്ചിട്ടുങ്കിലും അത് കാലഹരണപെട്ടതാണ് കാട്ടാന നാട്ടിലെത്താന്‍ കാരണം. ഇതിന് പരിഹാരം കാണാന്‍ പലതവണ  വനം വകുപ്പ് അധികൃതരോട് പറഞ്ഞിട്ടും ആവശ്യമായ നടപടികള്‍ എടുത്തില്ലെന്ന് നഗരസഭാ വികസനകാര്യ സ്റ്റാന്‍ഡിങ് കമ്മിറ്റി ചെയര്‍മാന്‍ ടി.എല്‍ സാബു പറഞ്ഞു.