തലശ്ശേരി: കള്ളനോട്ട് പിടികൂടിയ കേസില്‍ വിശദമായ അന്വേഷണങ്ങള്‍ക്കായി എന്‍.ഐ.എ സംഘം തലശ്ശേരിയിലെത്തി. സര്‍ക്കിള്‍ ഇന്‍സ്‌പെക്ടറുടെ നേതൃത്വത്തില്‍ മൂന്നംഗ എന്‍. ഐ.എ സംഘമാണ് കൊച്ചിയില്‍ നിന്നു തലശ്ശേരിയിലെത്തിയത്.  
 തലശ്ശേരി സൈദാര്‍പള്ളിക്കടുത്ത കൗലത്ത് മന്‍സിലില്‍ ഫൈനാസിനെയാണ് കഴിഞ്ഞ ദിവസം ആയിരം രൂപയുടെ കള്ളനോട്ടുമായി ധര്‍മടം പൊലിസ് അറസ്റ്റു ചെയ്തത്. ധര്‍മടത്തെ രണ്ടു കടകളില്‍ നിന്നും മൊബൈല്‍ റീചാര്‍ജ്ജ് കൂപ്പണുകള്‍ക്കു നല്‍കിയത് ആയിരം രൂപയുടെ കള്ളനോട്ടുകളായിരുന്നു. കടയുടമകള്‍ നല്‍കിയ വിവരത്തെ തുടര്‍ന്ന് ധര്‍മടം റെയില്‍വേ സ്റ്റേഷന്‍ പരിസരത്തു വച്ചാണ് ഫൈനാസിനെ പിടികൂടിയത്. ഇയാളുടെ കൈവശമുണ്ടായിരുന്ന ആയിരം രൂപയുടെ 29 കള്ളനോട്ടുകളും ഇയാളുടെ വീട്ടില്‍ നടത്തിയ പരിശോധനയില്‍ ആയിരം രൂപയുടെ എഴുപതു നോട്ടുകളും പൊലിസ് കണ്ടെത്തിയിരുന്നു.