പാരിസ്: പ്രശസ്ത ഫ്രഞ്ച് ഗായിക ഫ്രാന്‍സ് ഗാല്‍ അന്തരിച്ചു. 70 വയസായിരുന്നു. രണ്ടു വര്‍ഷത്തോളമായി അര്‍ബുദം ബാധിച്ചു ചികിത്സയിലായിരുന്നു ഗാല്‍.കഴിഞ്ഞ മാസം രോഗം ഗുരുതരമായതോടെ പാരിസിലെ ആശുപത്രിയില്‍ പ്രവേശിപ്പിച്ചിരിക്കുകയായിരുന്നു. 1960കളിലാണ് ഫ്രാന്‍സ് ഗാല്‍ അന്താരാഷ്ട്ര പ്രശസ്തി നേടുന്നത്. 1965ല്‍ ലക്‌സംബര്‍ഗിനെ പ്രതിനിധീകരിച്ച് യൂറോ വിഷന്‍ സംഗീത മത്സരത്തില്‍ വിജയിയായി. 'വാക്‌സ് ഡോള്‍, രാഗ് ഡോള്‍' എന്നു തുടങ്ങുന്ന ഗാനം പാടിയായിരുന്നു ഇത്.1947 ഒക്ടോബറില്‍ പാരിസില്‍ ഒരു സംഗീത കുടുംബത്തിലേക്കായിരുന്നു ജനം. ഗായകനും ഗാനരചയിതാവുമായ റോബര്‍ട്ട് ഗാല്‍ ആണ് പിതാവ്. ഫ്രഞ്ച് സംഗീത ഇതിഹാസങ്ങളായ എഡിത്ത് പിയാഫ്, ചാള്‍സ് എസ്‌നവോര്‍ എന്നിവര്‍ക്ക് റോബര്‍ട്ട് വരികളെഴുതിയിട്ടുണ്ട്. 16-ാം വയസില്‍ തന്നെ ഫ്രാന്‍സ് ഗാല്‍ സംഗീതരംഗത്ത് ചുവടുവച്ചിരുന്നു. 'ഡോണ്ട് ബി സോ സ്റ്റുപിഡ് ' എന്നു തുടങ്ങുന്ന ആദ്യ ആല്‍ബം രണ്ടു ലക്ഷത്തോളം കോപികള്‍ വിറ്റഴിഞ്ഞിരുന്നു.