നന്തി: ജാമിഅ ദാറുസ്സലാം അല്‍ ഇസ്‌ലാമിയ്യയുടെ കീഴില്‍ പ്രവര്‍ത്തിക്കുന്ന അന്‍പതോളം മത-ഭൗതിക-ഹിഫ്‌ള് പഠന കേന്ദ്രങ്ങളുടെ കൂട്ടായ്മയായ കോ-ഓര്‍ഡിനേഷന്‍ ഓഫ് ദാറുസ്സലാം ഇസ്‌ലാമിക് കോളജസിന്റെ (സി.ഡി.ഐ.സി) വാര്‍ഷിക ഇസ്‌ലാമിക് കലാമേള 'തനാഫുസ്-18' ന് നാളെ നന്തി ശംസുല്‍ ഉലമാ നഗറില്‍ തുടക്കമാവും.
കോളേജ്തല മത്സരങ്ങളില്‍ വിജയികളായ ആയിരത്തോളം പ്രതിഭകളാണ് നാല്‍പതോളം ഇനങ്ങളിലായി രണ്ട് ദിവസം മാറ്റുരക്കുന്നത്. ഉദ്ഘാടന സമ്മേളനം സമസ്ത കേരള ജംഇയ്യത്തുല്‍ ഉലമാ ജനറല്‍ സെക്രട്ടറി പ്രൊഫ.കെ.ആലിക്കുട്ടി മുസ്‌ലിയാര്‍ ഉദ്ഘാടനം ചെയ്യും. ജാമിഅ ദാറുസ്സലാം പ്രിന്‍സിപ്പല്‍ മുസക്കുട്ടി ഹസ്‌റത്ത് അധ്യക്ഷനാകും.
ചടങ്ങില്‍ ദാറുസ്സലാം ജന.സെക്രട്ടറി എ.വി.അബ്ദുറഹ്മാന്‍ മുസ്‌ലിയാര്‍ മുഖ്യപ്രഭാഷണവും അബ്ദുസ്സമദ് പൂക്കോട്ടൂര്‍ പ്രമേയപ്രഭാഷണവും നടത്തും. ഇ.കെ.അബൂബക്കര്‍ മുസ്‌ലിയാര്‍ മൊറയൂര്‍, പി.പി.ഉമര്‍ മുസ്‌ലിയാര്‍ കൊയ്യോട്, എം.പി.തഖിയ്യുദ്ദീന്‍ ഹൈതമി, മലയമ്മ അബൂബക്കര്‍ ബാഖവി തുടങ്ങിയവര്‍ പ്രസംഗിക്കും. വിവിധ സ്ഥാപന മേധാവികളും നേതാക്കളും സംബന്ധിക്കും.