ലണ്ടന്‍: വെസ്റ്റിന്‍ഡീസ് മുന്‍ പരിശീലകന്‍ ഫില്‍ സിമ്മണ്‍സ് അഫ്ഗാനിസ്ഥാന്‍ ക്രിക്കറ്റ് ടീമിന്റെ ഉപദേശകന്‍. അഫ്ഗാനിസ്ഥാന്‍ ക്രിക്കറ്റ് ബോര്‍ഡ് (എ.സി.ബി) മുന്‍ വിന്‍ഡീസ് താരം കൂടിയായ സിമ്മണ്‍സിനെ ഉപദേശകനായി നിയമിച്ചു. സിമ്മണ്‍സിന്റെ വരവ് ടീമിന്റെ പ്രകടനം മെച്ചപ്പെടുത്താന്‍ തുണയാകുമെന്ന് എ.സി.ബി പുറത്തിറക്കിയ വാര്‍ത്താക്കുറിപ്പില്‍ വ്യക്തമാക്കി. ഈ മാസം 16 മുതല്‍ നടക്കുന്ന അഫ്ഗാന്‍ ടീമിന്റെ സിംബാബ്‌വെ പര്യടത്തില്‍ സിമ്മണ്‍സ് ടീമിനൊപ്പം ചേരും. മുന്‍ ഇന്ത്യന്‍ താരം ലാല്‍ചന്ദ് രജ്പുതാണു അഫ്ഗാന്‍ ടീമിന്റെ നിലവിലെ ഹെഡ്ഡ് കോച്ച്.
53 വയസുകാരനായ സിമ്മണ്‍സിനെ 2016 സെപ്റ്റംബറില്‍ വെസ്റ്റിന്‍ഡീസ് ക്രിക്കറ്റ് ബോര്‍ഡ് ടീമിന്റെ പരിശീലക സ്ഥാനത്തു നിന്നു പുറത്താക്കിയിരുന്നു. ടീമിനു രണ്ടാം ടി20 ലോക കിരീടം നേടികൊടുത്ത് അഞ്ചു മാസം പിന്നിട്ടപ്പോഴായിരുന്നു വിന്‍ഡീസ് ബോര്‍ഡിന്റെ നടപടി. വെസ്റ്റിന്‍ഡീസിനായി 26 ടെസ്റ്റുകളും 143 ഏകദിനങ്ങളും കളിച്ച സിമ്മണ്‍സ് 2002ല്‍ വിരമിച്ച ശേഷമാണ് പരിശീലക വേഷത്തിലേക്ക് തിരിഞ്ഞത്. അയര്‍ലന്‍ഡ് ക്രിക്കറ്റ് ടീമിനെ എട്ടു വര്‍ഷത്തോളം പരിശീലിപ്പിച്ച് അവരെ മുഖ്യധാരയിലേക്കുയര്‍ത്തി മികച്ച ടീമാക്കി മാറ്റിയതാണു സിമ്മണ്‍സിനെ ശ്രദ്ധേയനാക്കിയത്.