സുല്‍ത്താന്‍ ബത്തേരി: ശമ്പളം ലഭിക്കാത്തതിനെത്തുടര്‍ന്ന് സാമ്പത്തിക പ്രതിസന്ധിയിലായ കെ.എസ്.ആര്‍.ടി.സി ഡ്രൈവര്‍ ആത്മഹത്യക്ക് ശ്രമിച്ചു. അമ്പലവയല്‍ തോമാട്ടുചാല്‍ തണ്ടാശേരി സുനില്‍കുമാറാ(43)ണ് ആത്മഹത്യക്ക് ശ്രമിച്ചത്.
ഇന്നലെ രാവിലെ 10ഓടെയാണ് സംഭവം. കെ.എസ്.ആര്‍.ടി.സി ജീവനക്കാര്‍ നടത്തിയ പണിമുടക്കില്‍ പങ്കെടുക്കുന്നതിന് രാവിലെ ബത്തേരി ഡിപ്പോയിലെത്തിയ സുനില്‍കുമാര്‍ പിന്നീട് വീട്ടിലേക്ക് മടങ്ങുംവഴി സംസ്ഥാന അതിര്‍ത്തി ടൗണായ താളൂരില്‍ എത്തി വിഷം കഴിക്കുകയായിരുന്നു.
വിഷം കഴിച്ച വിവരം ഇയാള്‍തന്നെ ഭാര്യയെയും ഡിപ്പോയിലെ സഹപ്രവര്‍ത്തകനെയും വിളിച്ചറിയിച്ചു. തുടര്‍ന്ന് കെ.എസ്.ആര്‍.ടി.സി ജീവനക്കാര്‍ എത്തി ഇയാളെ ആദ്യം ബത്തേരി താലൂക്ക് ആശുപത്രിയിലും പിന്നീട് കോഴിക്കോട് മെഡിക്കല്‍ കോളജിലും പ്രവേശിപ്പിച്ചു. രണ്ട് ദിവസമായി സാമ്പത്തിക പ്രതിസന്ധികാരണം സുനില്‍കുമാര്‍ അസ്വസ്ഥനായിരുന്നുവെന്ന് സഹപ്രവര്‍ത്തകര്‍ പറഞ്ഞു.