വണ്ടൂര്‍: മൊബൈലില്‍ പ്ലേ സ്റ്റോര്‍ തുറന്ന് വണ്ടൂര്‍ പ്ലസ് അടിച്ചാല്‍ ഇനി വണ്ടൂരിനെക്കുറിച്ചുള്ള മുഴുവന്‍ വിവരങ്ങളുമറിയാം. തേങ്ങയിടാന്‍, പറമ്പ് കിളക്കാന്‍, ഡോക്ടര്‍മാരുടെ ബുക്കിങ്, വിദ്യഭ്യാസ വിവരങ്ങള്‍, വില്‍ക്കാനും വാങ്ങാനും, തിയേറ്റര്‍ സിനിമകള്‍ തുടങ്ങിയ എല്ലാ വിവരങ്ങളും ഇനി ആപ്പ് പറഞ്ഞുതരും.
പ്രദേശത്തെ ടി.കെ ഷെഫീല്‍, റീക്കസ് ഏലാടന്‍, എ.പി നെഹ്്‌നൂദ് എന്നീ മൂവര്‍ സംഘത്തിന്റെ ഒരു വര്‍ഷത്തെ കഠിനാധ്വാനത്തിന്റെ ഫലമാണ് പുതിയ ആപ്പ്. പ്രാദേശിക വാര്‍ത്തകള്‍, ബ്ലഡ് ബാങ്ക്, വാഹനങ്ങള്‍, വിദ്യാഭ്യാസം, ബിസിനസ്, ജോലിക്കാര്‍, മെഡിക്കല്‍, ബസ്, ട്രെയിന്‍ സമയം, ജോലി ഒഴിവുകള്‍ എന്നിങ്ങനെ 15 വിഭാഗങ്ങളിലായാണ് ആപ്പ് തയാറാക്കിയിരിക്കുന്നത്. കൂടാതെ കെ.എസ്.ഇ.ബി ബില്ലുകള്‍, ടെലിഫോണ്‍ ബില്ലുകള്‍ തുടങ്ങിയവ ആപ്പിലൂടെ അടക്കാം. ഒരു ലക്ഷത്തോളം രൂപയാണ് പദ്ധതിക്കു ചെലവായത്.