റിയാദ്: രാജ്യത്തെ ആദ്യത്തെ വനിതാ സ്‌ക്വാഷ് മത്സരത്തിന് ഞായറാഴ്ച്ച കൊടിയേറും. സഊദിയില്‍ ആദ്യമായാണ് വനിതകളുടെ സ്‌പോര്‍ട്‌സ് വിഭാഗം ടൂര്‍ണമെന്റ് അരങ്ങേറുന്നത്. സഊദി പ്രൊഫഷണല്‍ സ്‌ക്വാഷ് അസോസിയേഷന്‍ (പി.എസ്.എ) യുടെ നേതൃത്വത്തില്‍ റിയാദില്‍ അരങ്ങേറുന്ന ടൂര്‍ണമെന്റില്‍ അന്ത്രാഷ്!ട്ര തലത്തിലെ പ്രമുഖ സ്‌ക്വാഷ് താരങ്ങളായ 32 പേര്‍ അണി നിരക്കും. ഇതില്‍ രാജ്യത്തെ ഏക സ്‌ക്വാഷ് താരവും ആദ്യ താരവുമായ നദ അബു അല്‍ നജയും പങ്കടുക്കുന്നുണ്ട്. സഊദികള്‍ക്ക് കൂടുതല്‍ മേഖലകള്‍ തുറന്നു കൊടുക്കുന്നതിന്റെ ഭാഗമായാണ് വനിതകളുടെ സ്‌പോര്‍ട്‌സ് വിഭാഗങ്ങളും രാജ്യത്തേക്ക് ആകര്‍ഷിക്കുന്നത്. 165,000 ഡോളര്‍ മൂല്യമുള്ള സമ്മാനമാണ് വിജയിയെ കാത്തിരിക്കുന്നത്.

ഫ്രഞ്ച് താരം കാമില്ലേ സെര്‍മിയെയായിരിക്കും സഊദി താരം നദ അബു അല്‍ നജ നേരിടുക. ഇതില്‍ വിജയിക്കുന്നവര്‍ പതിനൊന്നു തവണ ലോക ചാമ്പ്യന്‍ പട്ടം നേടിയ നിക്കോള്‍ ഡേവിഡിന്റെ ക്വാര്‍ട്ടര്‍ ഫൈനല്‍ മത്സരത്തില്‍ നേരിടേണ്ടി വരും. നദ അബു അല്‍ നജ തന്നെയാണ് തന്റെ എതിരാളിയെ തിരഞ്ഞെടുത്തതെന്ന് സഊദി പ്രൊഫഷണല്‍ സ്‌ക്വാഷ് അസോസിയേഷന്‍ ചെയര്‍മാന്‍ സിയാദ് അല്‍ തുര്‍ക്കി പറഞ്ഞു. ' സഊദി മാറികൊണ്ടിരിക്കുകയാണ്. ഇപ്പോള്‍ മാറ്റങ്ങള്‍ വളരെ പെട്ടെന്ന് തന്നെ സംഭവിച്ചു കൊണ്ടിരിക്കുന്നു' സിയാദ് അല്‍ തുര്‍ക്കി കൂട്ടിച്ചേര്‍ത്തു. ഈജിപ്ഷ്യന്‍ ലോക ചാമ്പ്യന്‍ ഷിപ്പ് റണ്ണര്‍ അപ്പ് നൂര്‍ ഇല്‍ ഷെര്‍ബിനിയുടെ നേതൃത്വത്തിലായിരിക്കും ടൂര്‍ണമെന്റ് അരങ്ങേറുക. ആഘോഷം പങ്ക് വെച്ച് ടൂര്‍ണമെന്റ് ദിനത്തില്‍ സഊദി ഫെഡറേഷന്‍ ഫോര്‍ കമ്മ്യുണിറ്റി സ്‌പോര്‍ട്‌സ് പ്രസിഡന്റ് പ്രിന്‍സസ് റീമ ബിന്‍ത് ബന്ദര്‍ അല്‍ സഊദ് രാജകുമാരി രാത്രി സല്‍ക്കാരവും ഒരുക്കിയിട്ടുണ്ട്.

നേരത്തെ, ലോക ചെസ് ചാമ്പ്യന്‍ ഷിപ്പ് സഊദിയില്‍ നടത്തി രാജ്യം ശ്രദ്ധ പിടിച്ച് പറ്റിയിരുന്നു. അതില്‍ വനിതകളുടെ സാന്നിധ്യം ഏറ്റവും ശ്രദ്ധേയമായിരുന്നു. ഇത് വരെ നടന്ന ലോക ചെസ് ചാമ്പ്യന്‍ ഷിപ്പില്‍ ഉണ്ടാകാത്ത അത്രയും മൂല്യമുള്ള സമ്മാനമാണ് നല്‍കിയിരുന്നത്.