കൊച്ചി: കാഴ്ച്ച പരിമിതരുടെ ടി20 ലോകകപ്പ് ക്രിക്കറ്റ് ടൂര്‍ണമെന്റില്‍ ഇന്ത്യ ഇന്നു ആസ്‌ത്രേലിയയെ നേരിടും. ഉച്ചയ്ക്ക് ഒരു മണിക്ക് കാക്കനാട് രാജഗിരി കോളജ് ഗ്രൗണ്ടിലാണ് മത്സരം. ആസ്ത്രലിയന്‍ ടീം മത്സരത്തിനായി ഇന്നു രാത്രിയോടെയും ഇന്ത്യന്‍ ടീം ഇന്നു രാവിലെയും കൊച്ചിയിലെത്തും.
ടീമിലെ മലയാളി താരം മുഹമ്മദ് ഫര്‍ഹാന്‍ ഇന്നു കളിക്കുമെന്നാണ് പ്രതീക്ഷിക്കുന്നത്. അഞ്ചു മത്സരങ്ങളില്‍ നാലെണ്ണത്തില്‍ വിജയിച്ച ഇന്ത്യ പാകിസ്താനോടു പരാജയപ്പെട്ടു.
മത്സരത്തിനു മുന്നോടിയായുള്ള ചടങ്ങില്‍ പി.ടി തോമസ് എം.എല്‍.എ, ബി.സി.സി.ഐ.മുന്‍ വൈസ് പ്രസിഡന്റും കേരള ക്രിക്കറ്റ് അസോസിയേഷന്‍ മുന്‍ പ്രസിഡന്റുമായ ടി.സി മാത്യു, കേരള ക്രിക്കറ്റ് അസോസിയേഷന്‍ സെക്രട്ടറി ജയേഷ് ജോര്‍ജ്ജ്, മുന്‍ ക്രിക്കറ്റ് താരം ശ്രീശാന്ത് തുടങ്ങിയവര്‍ പങ്കെടുക്കുമെന്ന് ക്രിക്കറ്റ് അസോസിയേഷന്‍ ഫോര്‍ ദി ബ്ലൈന്‍ഡ് കേരള ജനറല്‍ സെക്രട്ടറി രജനീഷ് ഹെന്റി അറിയിച്ചു.
ലോകകപ്പിലെ രണ്ടു മത്സരങ്ങള്‍ക്കാണ് കൊച്ചി വേദിയാകുന്നത്. നാളെ നടക്കുന്ന രണ്ടാം മത്സരത്തില്‍ ആസ്‌ത്രേലിയ ശ്രീലങ്കയെ നേരിടും. രാവിലെ ഒന്‍പതിനാണു മത്സരം.